Sabunçu rayonu — Bakıda rayonlardan biridir. 1992-ci ilə qədər Lenin rayonu adlanıb. Sabunçu qəsəbəsi isə hazırda Bakının Sabunçu rayonunda yerləşən şəhər tipli qəsəbədir. Bakının ən qədim kəndlərindən biri olub. Bakıdan əlavə Zaqatala rayonunun inzibati ərazi vahidində Sabunçu adlanan kənd var. Ermənistanda işğalda qalan ərazilərimizdə də eyni adlı toponimlər olub. Məsələn:
Sabunçu - İrəvan quberniyasının İrəvan qəzasında, indiki Talin rayonunda kənd. Rayon mərkəzindən 12 km məsafədə yerləşir. Qafqazın 5 verstlik xəritəsində qeyd edilmişdir. Kəndin adı «Sabunçular» formasında da göstərilir.
Səfəvi padşahlarından Sultan Hüseyn 1704 - cü ildə verdiyi fərmanda Aranda, Muğanda və İrəvan ətrafında yaşayan 36 türk tayfasından birinin sabunçu tayfasından olduğunu göstərir.
Sabunçu - İrəvan şəhərində məhəllə. Sabunçu türk mənşəli etnonimi əsasında
əmələ gələn etnotoponimdir. Quruluşca sadə toponimdir.
Sabunçu - İrəvan quberniyasının İrəvan qəzasında, indi Talin rayonunda dağ. Qafqazın 5 verstlik xəritəsində qeyd edilmişdir.
Sabunçu - İrəvan quberniyasının İrəvan qəzasında, indiki Qəmərli (Artaşat) rayonunda kənd.
Sabunçu adlanan toponim və oronim; türk dilində «kotan» mənasında işlənən saban sözünə “çı” şəkilçisinin qoşulması əsasında əmələ gələn sabunçu etnonimindən əmələ gəlmişdir. Qaraqalpaqlarda sapun tayfasının olması bu fikri təsdiq edir. Türk dilində də saban sözü eyni mənada işlədilir: “saban ad,toprağı kazarak altüst etmeye, tarlayı ekilebilecek duruma getirmeye yarayan, demir bir ucu bulunan ve çift süren hayvanlarca çekilen bir tarım aracı”. Gördüyümüz kimi “saban” sözü təsərrüfatla bağlıdır. Eyni zamanda türk dilində “sapan/sapand” adlanan uzağa daş atmaq, bəzən isə kiçik quşları ovlamaq məqsədilə işlədilən “ovçuluq” vasitəsi də var ki, o da yenə təsərrüfatla əlaqəli bir sözdür. (Mənbə: İbrahim Bayramov “Qərbi Azərbaycanın türk mənşəli toponimləri”)
F. Rüstəmova