İran Ermənistan münasibətlərində yeni çiçəklənmə dövrü başlayıb.

İran və Ermənistan arasında münasibətlər hər zaman yüksək səviyyədə olub. Qarabağın işğalından sonra bu münasibətlər daha da inkişaf etdirilib. Son günlər isə əlaqələrin yeni mərhələsi başlayıb.

30-u iyundan 2-si iyuladək Tehranda Avrasiya İqtisadi İttifaqının birgə komissiyasının iclası keçirilir. İclas Ermənistan baş nazirinin müavini Mqer Qriqoryanın sədrliyi ilə keçirilir. Tədbirdən sonra İranın energetika nazirinin müavini Humayun Ayeri və Mqer Qriqoryan elektrik enerjisinin verilməsi məsələlərini müzakirə ediblər. Dost ölkələr tarif qiymətlərində güzəşt edəcəklərini bildiriblər.

Ermənistanın İrandakı səfiri Artaşes Tumanyan İranın energetika naziri Rza Ərdahaniyanla görüşüb və tərəflər Ermənistan-İran elektrik xəttinin çəkilməsi, qaz və elektrik enerjisinin mübadiləsi proqramını, Mehri SES-nin tikintisini və başqa iqtisadi əməkdaşlığı müzakirə ediblər.

30 iyunda səfir Artaşes Tumanyan İranın yollar və şəhərsalma naziri Mohammad İslami ilə görüşüb nəqliyyat məsələlərini, o cümlədən İranla sərhəddə yerləşən işğal olunmuş Azərbaycan torpaqlarının ərazisindən separatçı Dağlıq Qarabağ rejiminə nəqliyyat dəhlizindən səmərəli istifadə yollarını müzakirə ediblər.

Hər iki dost ölkə perspektivdə Avrasiya İqtisadi İttifaqı çətiri altında azad ticarət əlaqələrinin imkanlarını da geniş müzakirə ediblər.

moderator.az