Qərb tərəfdaşları Ukrayna Prezidenti Volodimir Zelenskini ölkənin hərbi rəhbərliyində yaranan böhranı qısa zamanda aradan qaldırmağa çağırıb.

Globalinfo.az xəbər verir ki, bu barədə “Financial Times” nəşri məlumat yayıb.

Nəşrin yazdığına görə, Qərb rəsmilərindən biri Kiyevə müraciət edərək bildirib:

“Qərb sizin əsas maliyyə mənbəyinizdir. Bizə sabitlik lazımdır. Tanıdığımız, etibar etdiyimiz və işləyə biləcəyimiz insanlara ehtiyacımız var.”

Məlumata əsasən, ötən həftə vəzifədən azad edilən müdafiə naziri Mixail Fedorov Ukrayna Silahlı Qüvvələrinin Baş komandanı Aleksandr Sırskini açıq şəkildə tənqid edib. Bundan sonra ölkənin 16 şəhərində Fedorova dəstək məqsədilə etiraz aksiyaları keçirilib.

Bildirilir ki, yaranan vəziyyət fonunda Zelenski Sırskinin də istefasını nəzərdən keçirir. Nəşr qeyd edir ki, baş komandanın dəyişdirilməsi Ukraynanın müdafiə qabiliyyətinə mənfi təsir göstərə bilər. Digər tərəfdən, dəyişiklik tələblərinin nəzərə alınmaması hakimiyyətin reytinqini daha da zəiflədəcək.

Prezident Ofisi gərginliyi azaltmağa çalışır və yeni baş komandanın korpus rəhbərlərinin dəstəyi olmadan təyin edilməyəcəyinə dair mesaj verir. Eyni zamanda, hərbçilərin bir hissəsi Sırskini müdafiə edir.

Mənbələrin sözlərinə görə, Zelenski vəzifədən azad edilən Fedorova Milli Təhlükəsizlik və Müdafiə Şurasında geniş səlahiyyətlərə malik vəzifə təklif edib. Həmin vəzifədə o, hərbi texnologiyalar, orduda islahatlar, uzaqmənzilli silah istehsalı və müdafiə sənayesinə xarici investisiyaların cəlbi ilə məşğul ola bilərdi. Lakin iddialara görə, Fedorov yalnız müdafiə naziri postuna qayıtmağa razı olub.

Financial Times vurğulayır ki, Fedorovun müdafiə satınalmalarının islahatı, xarici tərəfdaşlarla əməkdaşlığın genişləndirilməsi və pilotsuz uçuş aparatlarının birgə istehsalının inkişafındakı rolu nəzərə alınaraq, bu kadr dəyişikliyi Qərb ölkələri ilə əməkdaşlığa da təsir göstərə bilər.

Nəşr əlavə edir ki, Ukraynada Rusiyaya qarşı döyüş təcrübəsinə malik gənc zabitlərin mövqeyi güclənir. Onlar müasir müharibə taktikasını, pilotsuz sistemlərdən geniş istifadəni, qərarların daha çevik qəbulunu və sürətli adaptasiyanı dəstəkləyirlər.