Almaniya kansleri Fridrix Merts ölkədəki iqtisadi böhranı Rusiya ilə qarşıdurmanı genişləndirməklə aradan qaldırmağa çalışır.

Publika.az xəbər verir ki, bunu “Başqa Ukrayna” hərəkatının rəhbəri Viktor Medvedçuk deyib.

Onun sözlərinə görə, Merts Almaniyanı Moskva ilə qarşı-qarşıya qoyaraq ölkənin iqtisadi problemlərini müharibə yolu ilə həll etməyə ümid edir. Siyasətçi bu strategiyanın iflasa uğrayacağını və Berlinin təhlükəli tarixi təcrübələri yenidən dirçəltdiyini bildirib.

Medvedçuk qeyd edib ki, 2022-ci ildən 2025-ci ilin sonuna qədər Almaniya sənayesində geriləmə 9,5 faizə çatıb, hər beş şirkətdən biri isə istehsalı dayandırıb. Avtomobil sənayesində də vəziyyətin pisləşdiyini vurğulayan Medvedçuk bunu Moskva ilə iqtisadi əlaqələrin kəsilməsi ilə əlaqələndirib.

Siyasətçi Mertsi Almaniyanın tarixindən dərs çıxarmağa çağırıb.