“Prezident İlham Əliyevin IV Şuşa Qlobal Media Forumunda enerji məsələlərinə geniş yer ayırması Azərbaycanın bu sahədə artan beynəlxalq əhəmiyyətinin nümunəsidir”.

Bunu Globalinfo.az-a Milli Məclisin iqtisadi siyasət, sənaye və sahibkarlıq komitəsinin üzvü, deputat Aydın Hüseynov deyib.

Onun sözlərinə görə, son illər həyata keçirilən layihələr ölkənin qlobal enerji bazarındakı mövqeyini daha da yüksəldib:

“Hazırda Azərbaycan 16 ölkəyə təbii qaz ixrac edir. Boru kəmərləri vasitəsilə bu qədər geniş coğrafiyanı əhatə edən ixrac marşrutları enerji siyasətinin uğurlu nəticələrindən biridir. Bu amil Azərbaycanın Avropanın enerji təminatındakı çəkisini artırıb. Rusiya-Ukrayna müharibəsindən sonra Avropada alternativ enerji mənbələrinə tələbat artdı. Həmin dövrdə Azərbaycan bütün öhdəliklərini vaxtında yerinə yetirdi. Sabit və məsuliyyətli əməkdaşlıq ölkəyə etibarlı tərəfdaş nüfuzu qazandırdı”.

Deputat qeyd edib ki, Azərbaycanın qaz hasilatını və ixracını artırmaq üçün kifayət qədər resursları var:

“Yeni yataqların işlənməsi və davam edən layihələr əlavə ixrac imkanları deməkdir. Bu potensial gələcək illərdə daha böyük həcmdə qaz tədarükünə şərait yaradır. Suriyaya qaz ixracının başlanması bazarların şaxələndirilməsi siyasətinin növbəti mərhələsidir. Yeni istiqamətlər iqtisadi əlaqələrin coğrafiyasını genişləndirir, ixrac marşrutlarının sayını artırır və Azərbaycanın regional enerji əməkdaşlığındakı mövqeyinə əlavə üstünlüklər qazandırır.

Azərbaycanın enerji siyasəti uzunmüddətli strateji maraqlara əsaslanır. Bu yanaşma beynəlxalq tərəfdaşlarla əlaqələri daha da dərinləşdirir, Avropanın və regionun enerji təhlükəsizliyinə ciddi dəstək verir. Enerji sahəsində əldə olunan nəticələr Azərbaycanın etibarlı tərəfdaş kimi nüfuzunu daha da gücləndirən əsas amillər sırasında yer alır”.