NATO-nun Baş katibi Mark Rutte 7-8 iyul tarixlərində Ankarada keçiriləcək NATO sammiti öncəsi verdiyi müsahibədə Rusiyanı alyans üçün əsas təhlükə adlandırıb.

Publika.az xəbər verir ki, Ruttenin sözlərinə görə, Ukraynaya qarşı davam edən hücumlar Rusiyanın NATO üçün ən böyük təhlükəsizlik təhdidi olduğunu göstərir.

O, həmçinin Rusiyanın Çin, İran və Şimali Koreya ilə əməkdaşlığını diqqətə çatdıraraq, alyansın çəkindiricilik qabiliyyətinin daha da gücləndirilməsinin vacibliyini vurğulayıb.

Baş katib Ankara sammitində müdafiə xərclərinin artırılması, Ukraynaya dəstəyin davam etdirilməsi və "NATO 3.0" konsepsiyasının əsas müzakirə mövzuları olacağını bildirib. Onun sözlərinə görə, yeni mərhələdə Avropa ölkələri və Kanada müdafiə sahəsində daha çox məsuliyyət daşıyacaq, ABŞ isə NATO daxilindəki aparıcı rolunu qoruyacaq.

Rutte Türkiyənin NATO üçün strateji əhəmiyyətini də xüsusi vurğulayıb. O, Türkiyənin alyansın ən güclü ordularından birinə sahib olduğunu, təxminən 3 min şirkətdən ibarət müdafiə sənayesinin NATO-nun güclənməsinə mühüm töhfə verdiyini deyib.

Baş katib əlavə edib ki, NATO yalnız Rusiyadan qaynaqlanan təhdidlərə deyil, terrorizmlə mübarizəyə də prioritet məsələ kimi yanaşır.