İran və ABŞ arasında imzalanması planlaşdırılan razılaşma memorandumu ilə bağlı yeni detallar ortaya çıxıb.

Publika.az xəbər verir ki, bu barədə “Mehr” agentliyi məlumat yayıb.

Bildirilib ki, memorandum 14 maddədən ibarətdir:

1. Livan da daxil olmaqla bütün cəbhələrdə hərbi əməliyyatların dərhal və daimi dayandırılması.

2. ABŞ-ın İranın daxili işlərinə qarışmamaq və İranın suverenliyinə hörmət etmək öhdəliyi.

3. Dəniz blokadasının 30 gün ərzində tamamilə ləğvi.

4. ABŞ-ın İran ətrafındakı qüvvələrini geri çəkmək öhdəliyi.

5. İranla razılaşmalar yolu ilə 30 gün ərzində Hörmüz boğazının yenidən açılması.

6. Neft, neft-kimya məhsulları satışına sanksiyaların dayandırılması və İranın maliyyə resurslarına tam çıxışın təmin edilməsi.

7. ABŞ və müttəfiqlərinin İran üçün ən azı 300 milyard dollar dəyərində yenidənqurma planlarını təqdim etmələri tələbi.

8. Nüvə məsələləri üzrə yekun razılaşmaya nail olmaq və ABŞ-ın ilkin və ikinci dərəcəli sanksiyalarının, BMT Təhlükəsizlik Şurası və MAQATE qətnamələrinin tamamilə ləğvi üçün 60 günlük danışıqlar.

9. İran nüvə silahı istehsal etməmək öhdəliyini təkrarlayır.

10. Danışıqlar zamanı ABŞ regionda hərbi mövcudluğunu artırmayacaq və yeni sanksiyalar tətbiq etməyəcək.

11. Yekun danışıqlar üçün 60 günlük müddət ərzində İran tərəfindən bloklanmış 24 milyard dollarlıq vəsaitin azad edilməsi, bu məbləğin yarısının danışıqlar başlamazdan əvvəl İrana verilməsi.

12. Razılaşmanın icrasını izləmək üçün mexanizm yaradılması.

13. Yekun razılaşma BMT Təhlükəsizlik Şurasının qətnaməsi ilə təsdiqlənəcək.

14. İranın dondurulmuş vəsaitlərinin yarısının sərbəst buraxılması, İrana qarşı neft sanksiyalarının dayandırılması və dəniz blokadasının qaldırılması şərti ilə yekun danışıqlar başlayacaq. Yekun razılaşma yalnız zənginləşdirilmiş materialların taleyini, sanksiyaların ləğvini və İranın iqtisadi yenidənqurma proqramını əhatə edəcək. İranın raket proqramı və müqavimət qruplarına dəstək qəti şəkildə gündəmdən çıxarılıb.

Qeyd olunub ki, Xarici İşlər Nazirliyinin sözçüsü İsmayıl Bəqayi bu mətnin İrandakı müvafiq qurumlar tərəfindən nəzərdən keçirilməli və yekunlaşdırılmalı olduğunu bildirib.