İran Hörmüz boğazı vasitəsilə bütün gəmilərin keçidini yenidən qadağan edə bilər.

Globalinfo.az xəbər verir ki, bu barədə “Tasnim” agentliyi İranın Ali Milli Təhlükəsizlik Şurasındakı mənbəyə istinadən məlumat yayıb.

Mənbənin sözlərinə görə, boğazın açıq qalması Livan ilə İsrail arasında əldə olunmuş atəşkəs rejiminə riayət edilməsindən asılıdır. Əgər bu razılaşma pozulsa, İran hərbi qüvvələri strateji su yolunu yenidən bağlayacaq.

Digər tərəfdən, “Fars News” bildirir ki, İran əvvəlcə Pakistan vasitəçiliyi ilə əldə olunan atəşkəs planı çərçivəsində hər gün məhdud sayda gəminin keçidinə icazə verib. Lakin Livanda atəşkəsin tam tətbiq olunmaması və Hizbullah ilə İsrailə şamil edilməməsi səbəbindən bu razılaşma dayandırılıb.

Məlumata görə, İran sonradan boğazı yenidən açsa da, bunun üçün üç əsas şərt irəli sürüb:

yalnız kommersiya gəmilərinin keçidinə icazə verilməsi,
hərbi gəmilərin buraxılmaması və yüklərin “düşmən ölkələrlə” əlaqəli olmaması,
marşrutların İran tərəfindən müəyyən edilməsi və keçidin İslam Respublikasının qüvvələri ilə koordinasiyası.
Eyni zamanda ABŞ prezidenti Donald Tramp sosial şəbəkə hesabında yazıb ki, İran bir daha Hörmüz boğazını bağlamamaq barədə razılıq verib və bu marşrut heç vaxt sülhə qarşı silah kimi istifadə olunmayacaq.

Hazırkı vəziyyət Yaxın Şərqdə gərginliyin davam etdiyini və strateji əhəmiyyətli Hörmüz boğazının yenidən qlobal qarşıdurmanın mərkəzinə çevriləcəyini göstərir.