ABŞ-nin diqqətinin İrana yönəlməsi fonunda Ukrayna-Rusiya münaqişəsində Avropanın daha da aktivləşdiyi hiss olunur.
Ötən həftə sonu Londonda Böyük Britaniya, Almaniya, Fransa və Ukrayna liderləri Rusiya ilə müharibəyə son qoymaqla bağlı "ədalətli və davamlı" razılaşma üçün beş şərt barədə razılığa gəliblər.
Bakupost.az xəbər verir ki, bu 5 şərtə aşağıdakılar daxildir:
Dərhal atəşkəsin əldə olunması. Rusiya Prezidenti Vladimir Putin hərbi əməliyyatların tamamilə dayandırılmasına razılıq verməlidir. Hazırkı təmas xətti danışıqların başlanğıc nöqtəsi olmalıdır və Ukraynanın ittifaq yaratmaq (o cümlədən NATO ilə) suveren hüququna tam hörmət edilməlidir.
Atəşkəsdən dərhal sonra Ukrayna üçün etibarlı hüquqi təhlükəsizlik zəmanətləri qüvvəyə minməli və burada Ukraynada beynəlxalq qüvvələrin yerləşdirilməsi əks olunmalıdır. Rusiya vəsaitləri Rusiya bütün itkiləri kompensasiya edənə qədər dondurulmuş qalacaq.
Sülh müqaviləsi Avropanın təhlükəsizlik maraqlarını nəzərə almalıdır.
Qəbul edilən bu 5 şərt elə tərtib olunub ki, ona əsasən Rusiya müharibədən əvvəlki vəziyyətə qayıtmalıdır. Bu isə o anlama gəlir ki, həmin şərtlər mövcud durumda sülhün əldə edilməsindən daha çox, Avropanın maraqlarının təmin edilməsinə yönəlib.
“Yeni Nəsil” Azərbaycan Jurnalistlər İttifaqının sədri, siyasi şərhçi Arif Əliyev Bakupost.az-a bildirib ki, Avropanın bu prosesdə rolu, ancaq ikinci dərəcəli, köməkçi roldan ibarətdir:
“Ona görə də onun qoyduğu bu 5 şərt əsasında heç danışıqlar belə getməyəcək, nəinki Rusiyanın buna razı olması, yaxud olmaması”.
Ekspert qeyd edir ki, sözügedən şərtlər problemin həllinə xidmət etmir:
“Avropa düzdür, çalışır ki, prosesə təsir etsin. Onun müharibə məsələsinin həllində iştirak üçün özünün digər mexanizmləri var. Amma sözügedən 5 şərt problemi həll etmək üçün deyil, daha çox ümumi atmosferə təsir etmək üçündür”.
Müsahibimizin sözlərinə görə, Avropa ölkələri bu addımla sadəcə olaraq Rusiyaya əlavə təzyiqlər, Ukraynaya əlavə dəstək barədə düşünürlər:
“Amma bu cür bəyanat və yaxud təkliflərin Rusiya ilə danışıqların əsasını yaratmaq məsələsində heç bir ciddi rolu yoxdur”.