Tehran tərəfindən təsis edilmiş Fars körfəzi Hörmüz Boğazı İdarəsi (PGSA) bu mühüm su arteriyasında məsuliyyət zonasını əks etdirən xəritəni dərc edib.

Publika.az xəbər verir ki, bu barədə qurumun "X" sosial şəbəkə səhifəsində paylaşım edilib.

Məlumata görə, İran Hörmüz boğazının idarə edilməsi üçün özünün "tənzimləyici yurisdiksiyasını" müəyyən edib. Bu zona şərqdə İranın Kuh-Mobarak bölgəsi ilə Birləşmiş Ərəb Əmirliklərinin (BƏƏ) Fuceyrə əmirliyinin cənub hissəsini, qərbdə isə İranın Qeşm adası ilə BƏƏ-nin Ümm əl-Qeyveyn əmirliyini birləşdirən xətlər arasında yerləşir.

Yeni qaydalara əsasən, boğazın bu hissəsindən keçmək niyyətində olan hər bir gəmi mütləq şəkildə PGSA ilə hərəkətlərini razılaşdırmalı və xüsusi icazə almalıdır.

Qeyd edək ki, İranın Ali Milli Təhlükəsizlik Şurası Hörmüz boğazı ilə bağlı məsələlərin birbaşa idarə olunması üçün xüsusi orqanın yaradılması barədə qərarı ötən bazar ertəsi elan etmişdi.