Rusiya Prezidenti Vladimir Putin Ukrayna müharibəsinin sona çatmaq üzrə olduğunu düşündüyünü bildirib.

Putinin sözlərinə görə, Avropa Kiyevə texnoloji yardım göstərməklə Ukrayna münaqişəsində gərginliyi artırmağa çalışır, lakin belə bir oyunun baha başa gələ biləcəyini də anlayır.

Ukrayna müharibəsi həqiqətən yekunlaşır? Putinin bu mesajının məqsədi nədir?

Globalinfo.az-a danışan politoloq Elxan Şahinoğlu deyib ki, Vladimir Putinin 9 May paradından sonra Kremlə Ukrayna ilə bağlı verdiyi açıqlamalar ziddiyyətlidir:

“Məsələn, o, Ukrayna Prezidenti Volodimir Zelenskinin Moskvaya getməli olduğunu deyir. Aydın məsələdir ki, bu, mümkünsüzdür. Ukrayna prezidentinin Moskvaya getməsi kapitulyasiya aktını imzalaması deməkdir.

Ümumiyyətlə, Ukrayna zəif deyil. İndiki mərhələdə kapitulyasiya aktını imzalaması da inandırıcı görünmür. Putin həmçinin deyir ki, Zelenski ilə üçüncü ölkələrin birində də görüşə bilər. Lakin mütləq danışıqlar masasında sənəd olmalıdır. Yenə də bu, kapitulyasiyadır. Zelenskinin bunu qəbul edəcəyini düşünmürəm.

O ki qaldı Putinin “Ukrayna müharibəsi sona çatmaq üzrədir” fikrinə, məncə, bu, söz arasında deyilən fikirdir. Qərb mətbuatında da bu fikir müzakirə edilir. Çünki Rusiya ordusu Ukraynada irəliləyə bilmir. Elə isə müharibə necə sona çata bilər?

Bu gün Ukrayna ordusu daha effektiv cavab zərbələri endirə bilir. Hətta paytaxt Moskva belə hədəfə alınır. Hesab edirəm ki, Putinin özü sülh istəyi ilə bu ifadələri dilə gətirir”.