Çin Xalq Respublikasının Prezidenti Si Cinpinin Moskvaya səfəri çərçivəsində Rusiya lideri Vladimir Putinlə görüşü siyasi arenada böyük maraq doğurdu. Belə ki, prezidentlərin təkbətək müzakirəsinin 7 saatdan çox davam etdiyi açıqlanıb.

Görüşdən sonra Çinin Xarici İşlər Nazirliyi tərəflərin Ukrayna münaqişəsinin sülh yolu ilə nizamlanması məsələləri ətrafında danışıqlar apardığını bildirib.

Mövcud geosiyasi vəziyyətdə iki ölkənin lideri başqa hansı məsələləri müzakirə etmiş ola bilər? Pekin Ukrayna mövzusunda Moskvaya nə tövsiyə edəcək?

Globalinfo.az-a danışan politoloq Məhəmməd Əsədullazadə deyib ki, Çin lideri görüş zamanı ilkin şərtlər irəli sürmədən danışıqlara başlamağın vacibliyini və ədalətli sülh sazişinin imzalanmasının əhəmiyyətini vurğulayıb:

“Putin də öz növbəsində ilkin şərtlər olmadan danışıqlara hazır olduğunu bildirib. Çin artıq bu müharibənin uzanmasında maraqlı deyil və ədalətli sülh ideyasını Rusiya prezidentinin diqqətinə çatdırıb.

Pekinin mövqeyində nəzərəçarpacaq dəyişikliklər baş verir. Belə ki, ABŞ Rusiya ilə enerji sektorunda əməkdaşlığı olan Çin şirkətlərinə qarşı sanksiyalar tətbiq edə biləcəyini açıq şəkildə bəyan edib. Bu isə Çin iqtisadiyyatına mənfi təsir göstərir. Vaşinqtonun bununla Pekini hədəfə alır.

Hazırda iqtisadiyyat və ticarət müharibəsinin Çinə qarşı formalaşdırdığı təzyiqlər artır. Müharibənin bu ölkə üçün beynəlxalq imic baxımından da zərərli nəticələr doğurduğu aydındır. Geosiyasi və iqtisadi müstəvidə ABŞ-ın irəliləməsinin qarşısını almaq istəyən Çin, vəziyyətin fərqindədir. Əgər Pekin Moskvaya ciddi təzyiqlər edərsə, bu, Putinin atəşkəsə razılaşmasına səbəb ola bilər”.