Rusiya prezidenti Vladimir Putin mayın 19-u axşam saatlarında Pekinə səfər edəcək. Onu hava limanında Çin xarici işlər naziri Vanq İ qarşılayacaq.

Globalinfo.az-ın xəbərinə görə, bu barədə Kremlin beynəlxalq məsələlər üzrə köməkçisi Yuri Uşakov məlumat verib.

Uşakovun sözlərinə görə, Çin tərəfi Putin üçün hava limanında təntənəli qarşılanma mərasimi təşkil edəcək.

“Liderimiz sabah axşam Pekinə çatacaq. Qarşılanma mərasimində Çin Kommunist Partiyası Siyasi Bürosunun üzvü və xarici işlər naziri Van İ şəxsən iştirak edəcək”, – deyə o bildirib.

Məlumata əsasən, Putin daha sonra fəxri qonaqlar üçün nəzərdə tutulmuş “Dyaoyutay” dövlət iqamətgahına yollanacaq. Mayın 20-də isə Pekinin mərkəzində yerləşən Tyananmen meydanında Çin sədri ilə rəsmi görüş mərasimi keçiriləcək.

Uşakov qeyd edib ki, Rusiya nümayəndə heyətinin tərkibinə baş nazir müavinləri və nazirlərlə yanaşı, dövlət korporasiyalarının rəhbərləri, iri bankların idarə heyəti sədrləri və böyük biznes nümayəndələri də daxil olacaq.
Kreml rəsmisi bildirib ki, bu dəfə Rusiya prezidentinin Çin mediasında ənənəvi məqaləsi deyil, Çin xalqına videomüraciəti yayımlanacaq.

Səfər çərçivəsində Putin və Çin sədri Cinpin həm təkbətək, həm də geniş tərkibdə danışıqlar aparacaqlar. Tərəflərin sənaye, nəqliyyat və atom energetikası sahələrində əməkdaşlığın genişləndirilməsi ilə bağlı təxminən 40 sənəd imzalayacağı gözlənilir. Liderlər daha sonra media qarşısında birgə bəyanatlarla çıxış edəcəklər.

Uşakovun sözlərinə görə, Rusiya ilə Çin arasında idxal-ixrac əməliyyatlarının demək olar ki, hamısı artıq rubl və yuanla həyata keçirilir. O bildirib ki, cari ilin ilk rübündə Rusiyanın Çinə neft ixracı 35 faiz artıb.
Kreml nümayəndəsi həmçinin vurğulayıb ki, Putinin Çinə getməsi ilə ABŞ prezidenti Donald Trampın Çin səfəri arasında heç bir əlaqə yoxdur.