“Regionumuzdakı proseslərin ahəngini pozmaq istəyən qüvvələr var. Bu, bizim üçün bəllidir. Dəfələrlə Prezident İlham Əliyev bu məsələlərlə bağlı öz prinsipial mövqeyini bildirib və ünvanlı şəkildə göstərib ki, hansı qüvvələr və siyasi dairələr Cənubi Qafqazda sülh prosesinə maneçilik törədirlər”.

Bu sözləri Globalinfo.az-a politoloq Tofiq Abbasov 6 may tarixində Fransanın Avropa və xarici işlər naziri Jan-Noel Barronun Senatda Azərbaycan əleyhinə səsləndirdiyi iddiaları şərh edərkən deyib:

Politoloq bildirib ki, bu məsələdə ilk növbədə Ermənistanın çox böyük günahı var:

“Bunu onlar dana bilməzlər. Çünki faktiki olaraq Ermənistanda ictimai-siyasi gərginliyin seçkilərlə bağlı olduğu aydındır. Bu vəziyyətdən sui-istifadə edən qüvvələr də var. Onlar çalışırlar ki, iki daş arasında öz imkanlarını və rıçaqlarını yerləşdirsinlər.

Bu məsələlərlə bağlı əvvəla İrəvan prinsipial davranmalıdır. Ermənistanda Avropa İttifaqının müşahidə missiyası fəaliyyət göstərir. Lakin onların fəaliyyəti ilə bağlı heç bir açıq məlumat yoxdur. Qapalı şəkildə işləyirlər və “binokl diplomatiyası” həyata keçirirlər. Ümumilikdə isə sülh prosesinə heç bir töhfələri yoxdur. Dəfələrlə Ermənistan tərəfində atəşkəs pozulub, amma onların səsi çıxmayıb.

İndi isə hibrid təhdidlər var. Avropa İttifaqı çalışır ki, regiona yeni missiya göndərilsin. Əgər məsələ sadəcə seçkilərlə bağlıdırsa, onda niyə iki il müddətində Ermənistanda qalırlar?”

Politoloq bildirib ki, Azərbaycan dəfələrlə ATƏT və AŞPA kimi təşkilatların pozucu fəaliyyətinin şahidi olub:

“Onlar regionumuzda eskalasiyanın azalmamasını, əksinə, güclənməsini istəyirlər. Adı çəkilən qüvvələr regionun strateji mahiyyətini anlayar, özlərinə müdaxilə imkanının yaranması üçün burada qeyri-sabit vəziyyətin olmasını istəyirlər.

Fransa Prezidenti Emmanuel Makron üç il öncə açıq şəkildə çalışırdı ki, regiona “sülh araşdırıcı missiya” və kontingent gətirsin. Buna baxmayaraq, Azərbaycan daim prosesləri nəzarətdə saxlayaraq öz mövqeyini bildirib.

Bakının yanaşması aydın və düzgündür. Çünki sülhə nail olmaq region xalqları üçün vacibdir. Azərbaycan bunu Ermənistan üçün dəfələrlə deyib. Bir tərəfdən tranzit xətləri açılır, digər tərəfdən ilkin iqtisadi təmaslar var. Ermənistan isə yalnız danışır”.