Ermənistan Baş naziri Nikol Paşinyanın rəqibləri onun ölkəni parçalayacağını iddia edir. Bunu Paşinyanın Azərbaycana çox güzəşt etdiyi, Ermənistanı dost olmayan ölkələrdən asılı vəziyyətə saldığını əsas gətirərək deyirlər.

Paşinyan isə son zamanlar israrla bildirir ki, xəyali Ermənistanı unudub real Ermənistana qayıtmaq lazımdır. Paşinyanın bu konsepsiyanı ortaya atmaqla ölkəsini və xalqını xilas etməyə çalışdığı deyilir.

Mövzunu Globalinfo.az-a şərh edən politoloq Zeynal Əmrəliyev deyib ki, Nikol Paşinyanın rəqibləri əsasən keçmiş revanşistlərdir:

“Onlar israrlı şəkildə çalışırlar ki, sülh müqaviləsi ilə bağlı müsbət addım atılmasın. Burada həm də Rusiyaya bağlı qüvvələrin fəallığını görürük.

Paşinyan hökumətinin ölkəni Rusiya təsirindən çıxarması və Qərblə yaxınlaşması həmin qüvvələrin mənafeyinə toxunur. 20 ilə yaxın Ermənistanı terrorla idarə etmiş Köçəryan-Sərkisyan rejimi hər iki məsələdə təxribat törətmək istəyir. Başda erməni diasporu olmaqla revanşist qüvvələrin xəyalında olan “Böyük Ermənistan” ideyası artıq fiaskoya uğrayıb. Azərbaycan təkcə öz torpaqlarını azad etmədi, həm də bu xəstə ideologiyanı məhv etdi.

“Miatsum” ideyaları isə İlham Əliyevin ayaqları altında Xankəndidə can verdi. Bu qüvvələr Ermənistanda vətəndaş müharibəsi yaratmaq istəyirlər. Qarabağ erməniləri ilə Ermənistan erməniləri arasında çox kəskin qarşıdurma var. Paşinyan Qarabağ klanını faktiki olaraq siyasi həyatdan uzaq tutub. Buna görə bu qüvvələr lazım gəlsə Ermənistanı parçalayıb yeni dövlət belə qurmağa hazırdırlar. Onlar yaxşı başa düşürlər ki, artıq Qarabağı yenidən işğal etmək mümkün deyil. Buna görə də maksimum dərəcədə siyasi təxribatlarla məşğuldurlar. Bütün bunlar Ermənistanda vəziyyəti gərginləşdirə və gələcəkdə vətəndaş müharibəsinə belə səbəb ola bilər”.