ABŞ Silahlı Qüvvələri Fars körfəzi bölgəsinə altıncı esminesini göndərib.

Globalinfo.az xəbər verir ki, bu barədə “CBS News” telekanalı və “Reuters” agentliyi məlumat yayıb.

Adı açıqlanmayan Amerika rəsmisi bildirib ki, hazırda ABŞ-ın Yaxın Şərq regionunda bir aviadaşıyıcısı, altı esminesi və üç sahilboyu döyüş gəmisi mövcuddur. Onlar artıq bölgəyə çatıblar.

Xatırladaq ki, ABŞ dövlət katibi və prezidentin milli təhlükəsizlik üzrə müşaviri Marko Rubio Vaşinqtonun İrana qarşı mümkün hərbi əməliyyatını istisna etməyib. Onun sözlərinə görə, bu addım ABŞ tərəfindən “preventiv tədbir” kimi qiymətləndirilə bilər. Rubio əlavə edib ki, İran ətrafında artan gərginlik fonunda ABŞ Yaxın Şərqdə hərbi mövcudluğunu genişləndirmək niyyətindədir.

Hazırda regionda vəziyyət gərgin olaraq qalır və tərəflərin növbəti addımları beynəlxalq ictimaiyyət tərəfindən diqqətlə izlənilir.