Hazırda regionda tranzit və nəqliyyat əlaqələri öz aktuallığını qoruyur. Belə ki, Rusiya Azərbaycan üzərindən Ermənistana dəmir yolu ilə mal daşıyır, eləcə də İrana humanitar yardım göndərir.

Bu zaman tranzit ölkəyə hər hansı ödəniş edilirmi?

Globalinfo.az-a danışan Liberal İqtisadçılar Mərkəzinin sədri, ekspert Akif Nəsirli deyib ki, dəmir yolu ilə yük daşıdıqda bu proses adətən tranzit daşımalar kimi rəsmiləşdirilir:

“Daha sonra tranzit ölkə kimi Azərbaycana müəyyən ödənişlər edilir. Bu ödənişlər əsasən dəmir yolu infrastrukturundan istifadə haqqı, tariflər və xidmət xərcləri formasında olur. Məbləğ daşınan yükün növünə, həcminə, məsafəyə və tətbiq olunan tarif siyasətinə görə dəyişir”.

Ekspert bildirib ki, humanitar yardım məsələsində isə bəzi hallarda xüsusi güzəştlərin tətbiqi mümkündür:

“Dövlətlərarası razılaşmalar əsasında humanitar yüklər üçün tariflər azaldıla və ya tamamilə ləğv edilə bilər. Bu, siyasi qərarlardan və konkret razılaşmalardan asılıdır. Ümumilikdə, tranzit daşımalar tam ödənişsiz olmur, amma humanitar və ya xüsusi statuslu yüklər üçün fərqli, daha yumşaq şərtlər tətbiq oluna bilər”.