Son zamanlar ölkədə ailə qurmaqdan çəkinənlərin sayı artıb. Bu səbəbdən evliliklərin sayında əvvəlki illərlə müqayisədə azalma müşahidə olunur. Əsas səbəblərdən biri gənclərin şəxsi mənzilə sahib olmamasıdır. Hazırda ev almaq üçün minimum 80-100 min manat vəsait tələb olunur ki, bu da həm yüksək gəlir, həm də kredit götürmək istəyənlər üçün kifayət qədər ağır şərtlər deməkdir.

Bəs gənclərin ev sahibi olması və ailə qurması üçün hansı konkret dəstək mexanizmləri tətbiq edilməlidir?

Globalinfo.az-a danışan iqtisadçı Natiq Cəfərli bildirib ki, əslində, problemin həlli yolları mövcuddur.

İqtisadçının sözlərinə görə, Azərbaycanda sosial ipoteka mexanizmi olsa da, onun həcmi kifayət qədər məhduddur:

“Azərbaycanda sosial ipoteka var, lakin payı cəmi 4 faizdir. Bu isə çox azdır və müraciət edənlərin sayı bundan dəfələrlə çoxdur. Ona görə də Bakı şəhərinin gələcəyi barədə ciddi düşünmək lazımdır. Torpaqlarımız işğaldan azad olunub və yeni imkanlar yaranıb”.

N.Cəfərli hesab edir ki, gənc ailələr üçün alternativ istiqamətlər təşviq olunmalıdır:

“Gənc ailələrə işğaldan azad olunmuş ərazilərdə – Xankəndi, Ağdam, Füzuli, Zəngilan, Qubadlı kimi bölgələrdə yaşamaq üçün faizsiz kreditlər verilməli, onlar mənzillə təmin olunmalı və iş yerləri yaradılmalıdır. Bu, gənclərin yalnız Bakıda deyil, regionlarda, xüsusilə də azad olunmuş ərazilərdə məskunlaşmasına şərait yaradar. Beləliklə, bir neçə problem eyni vaxtda həll olunar. Məsələn, Qarabağ və Şərqi Zəngəzurda məskunlaşma sürətlənər, yeni iş yerləri yaranar və tikinti sektoru inkişaf edər”.

Natiq Cəfərlinin fikrincə, hazırda əsas problem yanaşmadadır:

“Bizdə “mənzilə çıxış imkanları məhduddur” deyəndə yalnız Bakı nəzərdə tutulur. Bu isə düzgün yanaşma deyil. Paytaxt artıq həddindən artıq yüklənib və demək olar ki, yaşanılmaz vəziyyətə gəlib. Hətta güclü yağış zamanı belə şəhər iflic olur. Bütün bu problemlərə kompleks yanaşmaq lazımdır”.