İran Prezidenti Məsud Pezeşkianın azərbaycanlı həmkarı İlham Əliyevlə birbaşa əlaqə saxlamaq əvəzinə, martın 6-da Rusiya lideri Vladimir Putinə zəng edərək ölkəsinin Azərbaycana dron hücumu həyata keçirmədiyini bildirib. O, baş verən hadisəni “düşmənlərin əməli” kimi qiymətləndirib.

Pezeşkianın Naxçıvana dron hücumu ilə bağlı üzr istəmək və ya məsələni araşdırmaq əvəzinə təkzib yolunu seçməsi isə birmənalı qarşılanmayıb. Ekspertlər hesab edir ki, İran prezidentinin “düşmənlərin əməlidir” iddiasının arxasında hücumun ABŞ və ya İsraillə əlaqələndirilməsi cəhdi dayanır.

İran prezidenti niyə Azərbaycan Prezidentinə zəng etməkdən çəkinir? Susqunluğunun səbəbi nədir?

Globalinfo.az-a danışan politoloq Əlimusa İbrahimov deyib ki, Azərbaycan tərəfi hadisə ilə bağlı İran rəhbərliyindən rəsmi açıqlama gözləyir:

“Hadisə ya təkzib edilməli, ya da baş vermiş insidentlə bağlı müvafiq üzr ifadə olunmalıdır. Lakin İran tərəfindən rəsmi və ciddi mənbələrdən, xüsusilə də ölkə rəhbərliyindən bu günə qədər konkret bəyanat verilməyib. Bu isə hadisənin məqsədyönlü şəkildə atılmış addım ola biləcəyi ehtimalını gündəmə gətirir.

Heç şübhəsiz, Prezident İlham Əliyev hadisənin İran tərəfindən törədildiyini bəyan edərkən kifayət qədər ciddi sübutlara əsaslanır. Buna görə də İran Prezidenti Məsud Pezeşkian və digər yüksək səviyyəli rəsmilərdən məsələ ilə bağlı aydın mövqe gözlənilir.

Onun bu barədə açıq bəyanat verməməsi və Prezident İlham Əliyevə zəng etməməsi diqqət çəkir. Çünki indiyədək iki ölkə lideri arasında münasibətlər kifayət qədər normal və işgüzar xarakter daşıyıb. Təbii gözlənti də belə idi ki, yaranmış vəziyyətlə bağlı birbaşa əlaqə qurulsun.

Əgər bu hadisə İran tərəfindən məqsədyönlü şəkildə təşkil edilməyibsə belə, ən azı rəsmi izahat və ya üzr ifadə olunmalıdır. Görünür, Pezeşkian ehtiyatlı davranmağa çalışır. Bunun səbəbinin onun üzərində müxtəlif siyasi qüvvələrin təzyiqinin olması mümkündür.

Bu baxımdan, o, hələlik birbaşa telefon danışığından çəkinə bilər. Lakin istənilən halda digər diplomatik kanallar vasitəsilə müəyyən addımların atılması gözləndir. Yaxın günlərdə Pezeşkianın İlham Əliyevlə telefon danışığı həyata keçirməsi də mümkündür”.