İranın xarici işlər naziri Abbas Əraqçi “ABC News”a müsahibəsində hücumların arxasında diplomatik danışıqlar prosesini pozmaq istəyən qüvvələrin dayandığını iddia edib. Onun sözlərinə görə, danışıqlar müsbət istiqamətdə irəlilədiyi üçün müəyyən dairələr bu prosesi pozmaq qərarına gəlib.

Əraqçi bildirib ki, nəticədə ABŞ Prezidenti Donald Tramp prosesə cəlb olunub və İrana qarşı “səbəbsiz və haqsız” hücuma sövq edilib. İsrailin məhz Cenevrədə ABŞ və İran nümayəndə heyətləri arasında ilkin razılığın əldə olunması, danışıqların isə Vyanada davam etdiriləcəyinin açıqlanmasının ertəsi günü hücuma keçməsi diqqət çəkir.

Bir gecədə nə baş verdi ki, diplomatik masa hərbi zərbələrlə əvəz olundu? İsrailin hücumu ABŞ–İran diplomatik prosesinin tamamilə dayanması deməkdir, yoxsa bu, yeni mərhələnin başlanğıcıdır?

Globalinfo.az-a danışan politoloq Fərhad Məmmədov deyib ki, İranın ali rəhbəri Əli Xameneinin olduğu yer barədə dəqiq məlumatın əldə edilməsi və onun zərərsizləşdirilməsi ehtimalının yüksək qiymətləndirilməsi belə bir qərarın verilməsinə səbəb olub:

“Əslində, heç nə birdən-birə baş verməyib. Adətən bu cür addımlar kəşfiyyat məlumatları və dəqiq informasiyalar əsasında atılır. Görünür, konkret və təsdiqlənmiş məlumatlar əldə edilib.

Danışıqlar aparılsa da, İran tərəfi ABŞ-ın təkliflərini qəbul etmirdi. Belə olan halda, daha ciddi addımların atılması zəruri hesab olunurdu. Xüsusilə danışıqların dalana dirənməsində Əli Xamenei faktoru mühüm rol oynayırdı. Vaşinqton anlayırdı ki, o var olduğu müddətdə danışıqlardan real nəticə əldə etmək çətin olacaq. Məhz buna görə də belə bir qərar verildi”.