İranın ali dini lideri Ayətullah Əli Xameneinin ordunun hava qüvvələri və hava hücumundan müdafiə komandirləri ilə görüşündəki açıqlamaları maraqla qarşılanıb. Xamanei ABŞ-la danışıqların ölkənin problemlərinin həllinə heç bir təsirinin olmadığını bildirib.

O, Donald Trampın birinci prezidentliyi dövründə ABŞ-la iki il müddətinə danışıqlar aparıldığını, ancaq heç bir nəticə əldə olunmadığına qeyd edib. Dini liderin sözlərinə görə, danışıqlar zamanı Vaşinqtonla Tehran arasında müqavilə imzalansa da, sonrakı müddətdə icra edilməyib.

Bundan öncə isə İran Prezidenti Məsud Pezeşkian xarici KİV-ə müsahibəsində ABŞ-la bağlı müsbət siqnallar verir, Trampa sui-qəsdin arxasında Tehranın olmadığını deyir və ölkənin danışıqlara hazır olduğunu bildirirdi.

Mövcud vəziyyətdə Xamenenin açıqlamaları nəyə hesablanıb?

Globalinfo.az-a danışan politoloq Teymur Qasımlı deyib ki, Əli Xameneinin indiki məqamda bu bəyanatı verməsi səbəbsiz deyil:

“Belə ki, Tramp İrana qarşı növbəti sanksiyalar paketini imzaladı. Bundan başqa o, İsrailin Baş naziri Benyamin Netanyahu ilə də görüşdü.
Ağ Ev rəhbəri İsrailin İrana hücumunu, yaxud zərbələr endirmə planını dəstəkləmir. Əvəzində Tehrana sanksiyaların tətbiq olunmasını, bu yolla zəiflədilməsini təklif edir. Mümkündür ki, Əli Xameneinin son açıqlamasın səbəbi də məhz bunlardır”.