İran İslam Respublikasının müdafiə və silahlı qüvvələrə dəstək naziri Əziz Nəsirzadənin başçılıq etdiyi nümayəndə heyəti fevralın 6-da Bakıya səfər edib. Nazir səfər çərçivəsində Prezident İlham Əliyevlə görüşüb.

Söhbət zamanı ikitərəfli münasibətlərin inkişafı qeyd olunub, müdafiə sahəsində əməkdaşlığın perspektivləri ilə bağlı fikir mübadiləsi aparılıb. İranlı nazirin mövcud geosiyasi gərginlik və ölkəsinə hücum təhlükəsi fonunda Bakıya səfəri diqqət çəkib.

Globalinfo.az-a danışan politoloq Məhəmməd Əsədullazadə deyib ki, bu səfər İran böhranı fonunda mühüm əhəmiyyət kəsb edir:

“İranın müdafiə naziri islahatçı qanada mənsub olan Prezident Məsud Pezeşkianla koordinasiyalı şəkildə fəaliyyət göstərir. İranda güc strukturları daxilində əsas söz sahibi isə SEPAH – İslam İnqilabı Keşikçiləri Korpusudur. SEPAH birbaşa Ali rəhbər Əli Xameneiyə tabedir, ölkənin təhlükəsizlik və regional siyasətində həlledici rol oynayır.

Prezident Məsud Pezeşkian Azərbaycanla həm siyasi, həm də hərbi əməkdaşlıqda maraqlıdır. Səfər çərçivəsində İran Silahlı Qüvvələri ilə Azərbaycan Silahlı Qüvvələri arasında mümkün birgə əməkdaşlıq məsələləri müzakirə edilib. Bu, rəsmi Tehran daxilində Bakı əlaqələrin inkişafına yönəlik müəyyən siyasi iradənin mövcud olduğunu göstərir.

Prezident İlham Əliyev İranla bağlı mövqeyini ifadə edərək, siyasi müstəvidə mövcud böhranın aradan qaldırılması üçün vasitəçilik funksiyasını yerinə yetirməyə hazır olduğunu bildirib. Bu yanaşma Azərbaycanın İran siyasətində praqmatik xəttə sadiq qaldığını və hərbi eskalasiyanın əleyhinə olduğunu nümayiş etdirir.

Lakin iranlı nazirin səfərinin müsbət istiqamətdə inkişaf etməsinin qarşısını SEPAH-ın alması mümkündür. SEPAH-a nəzarət edən media resursları və ona yaxın yüksək rütbəli hərbi şəxslər mütəmadi olaraq anti-Azərbaycan mövqeyi sərgiləyir ki, bu da ikitərəfli münasibətlərin dərinləşməsi üçün ciddi maneə yaradır”.