ReAl Partiyasının sədri Natiq Cəfərli Teleqraf-ın suallarını cavablandırıb.

Onunla müsahibəni təqdim edirik:

- Natiq bəy, ABŞ-nin vitse-prezidenti Ceyms Devid Vens Azərbaycan və Ermənistana gözlənilən səfərində əsas mövzunun TRIPP (Zəngəzur dəhlizi) ilə bağlı olacağı iddia edilir. Ümumilikdə bu səfərin regional proseslərə təsiri ilə bağlı proqnozlar nədən ibarətdir?

- Bu səfərin əsas mesajı ondan ibarətdir ki, ABŞ Cənubi Qafqazda maraqlıdır və bölgədə artıq mövcuddur. Verilən digər mesaj odur ki, bu region heç də Rusiyanın təsir dairəsinə daxil deyil. Səfərin də vacib əhəmiyyəti məhz bundan ibarətdir. Çünki Azərbaycanın apardığı siyasət, Türkiyə ilə birlikdə qurduğu konfiqurasiya Cənubi Qafqazda Rusiyanın mövqelərini zəiflətmişdi. Nə qədər qəribə səslənsə də, bu Ermənistanın da daha rahat davranmasına səbəb olub. Ona görə də, Vensin səfəri ABŞ-nin bölgəyə olan marağının obrazlı desək, “möhürlənməsidir”. Bu, o deməkdir ki, bölgədə ABŞ də var və bu region Ağ Ev üçün maraqlıdır. Gələcəkdə ABŞ Cənubi Qafqaz, Orta Asiya respublikalarında və Azərbaycanın da burada çox ciddi körpü rolunu nəzərə alaraq Bakı ilə də münasibətlərin inkişafına daha çox maraq göstərəcək. ABŞ-nin verməyə çalışdığı ilk qlobal mesaj həmçinin də bununla bağlıdır. Təbii ki, səfər çərçivəsində TRIPP (Zəngəzur dəhlizi) ilə bağlı müxtəlif məsələlər, vacib detallar da müzakirə ediləcək. Artıq dəhlizlə bağlı texniki əsaslandırma işləri də icra edilir. Çox güman ki, Ermənistandakı seçkilər ərəfəsində dəhlizin tikintisi ilə bağlı da müəyyən addımlar atılacaq.

- Vensin səfəri Ermənistanda bu ilin yayında keçiriləcək seçkilər və ondan sonra baş verəcək proseslər üçün nə dərəcədə təsirli ola bilər?

- Bu əslində Ermənistanın hazırkı iqtidarı, yəni, Baş nazir Nikol Paşinyan və onun komandası üçün dəstək mesajıdır. Bu da olduqca vacibdir. Çünki Azərbaycan sülh gündəmini Paşinyan və komandası ilə daha irəli aparmağa nail oldu. Bu yaxınlarda Azərbaycan və Ermənistan liderlərinin Birləşmiş Ərəb Əmirliklərindəki görüşü də münasibətlərin nə qədər intensiv inkişaf etməsindən xəbər verdi.

- Sülh gündəmi ilə bağlı nələrin müzakirə ediləcəyi gözlənilir?

- Sözsüz ki, Vensin səfərində sülh gündəmi, Cənubi Qafqazın gələcək rifahı, investisiya məkanına çevrilməsi ətrafında müzakirələrin aparılacağı proqnozlaşdırılır. Həmçinin daha spesifik məsələlərin də müzakirə ediləcəyi gözlənilir. Məsələn, Cənubi Qafqazda yeni enerji layihələrinin inkişaf etdirilməsi, data mərkəzlərinin yaradılması və Amerika şirkətlərinin Orta Asiya respublikalarına çıxış imkanlarının Cənubi Qafqaz, o cümlədən Azərbaycan üzərindən həyata keçirilməsi kimi məsələlər də Vensin səfəri zamanı müzakirə edilən əsas məsələlərdən olacaq. Bütün bunların fonunda sülhlə bağlı daha da möhkəmləndirici mesajlar səsləndiriləcək.