Son günlər qızılın və gümüşün qlobal bazarda qiyməti sıçrayışla artıb. Belə ki, gümüşün dəyəri 13.62% artaraq trua unsiyası üçün 115.13 dollara çatıb, qızılın qiyməti tarixi rekord həddə yüksələrək, bir unsiya üçün 5 min ABŞ dollarını ötüb.

Bu, qlobal aktorların müdaxiləsi ilə baş verir, ya təbii prosesdir? Hazırda dünya iqtisadi xəritəsində nələr baş verir?

Globalinfo.az-a danışan iqtisadçı Elçin Rəşidov deyib ki, sözügedən qiymət artımı əsasən geosiyasi risklərin və qlobal gərginliyin yüksəlməsi ilə bağlıdır:

“Eyni zamanda tariflərin artırılması qlobal biznes və iqtisadiyyatların yavaşlamasına səbəb olub. Bu proses investorları alternativ yatırım aləti kimi qızıl və gümüşə yönəldib. Tarif artımları və geosiyasi hadisələr dünya üzrə bir çox bizneslərə mənfi təsir göstərib. Nəticədə həm investorların, həm də mərkəzi bankların qızıl və gümüşə marağı artıb ki, bu da həmin metalların qiymətlərinin yüksəlməsinə gətirib çıxarıb. Hazırda dünya iqtisadi xəritəsində müşahidə olunan əsas proseslər də məhz bunlardır”.

İqtisadçı bildirib ki, tarif müharibələri və ölkələr arasında iqtisadi qarşıdurmalar fonunda bu il qlobal iqtisadi artımın zəifləyəcəyi gözlənilir:

“Proqnozlar ümumilikdə pessimistdir və bu proses müxtəlif ölkələrə fərqli təsir göstərəcək. Lakin qlobal miqyasda yavaşlama tendensiyası qaçılmaz görünür. Ümumilikdə, bu artımlar fonunda müəyyən sürpriz hadisələrin baş verəcəyi istisna edilmir. Ancaq bunun nədən ibarət olacağını indidən demək düzgün deyil”.