Ukrayna Müdafiə Qüvvələri cəbhənin Kupyansk və Pokrovsk istiqamətlərində irəliləyişə nail olublar.

Teleqraf xəbər verir ki, bu barədə ABŞ-nin Müharibə Araşdırmaları İnstitutunun (ISW) yeni hesabatında bildirilib.

Analitiklər bu qənaətə son günlər yayılan geolokasiya kadrlarını təhlil edərək gəliblər.

Hesabata əsasən, yanvarın 15-də dərc olunan görüntülər Ukrayna qoşunlarının Xarkov vilayətinin Kupyansk şəhərindən şimalda irəlilədiyini təsdiqləyir. Eyni zamanda, yanvarın 16-sı və 17-də Rusiya ordusunun Kupyanskın özünə, eləcə də Dvorıçna, Krasnoye Pervoye, Petropavlovka, Podol, Kuçerovka, Pesçannoye və Kurilovka istiqamətlərinə hücum etdiyi qeyd olunub.

ISW yanvarın 17-nə aid kadrlara istinadən bildirir ki, Ukrayna qüvvələri Donetsk vilayətində Pokrovskdan şərqdə yerləşən Svetloye yaşayış məntəqəsinin şimal-qərbində də irəliləyiş əldə ediblər.

Rusiya tərəfi isə Pokrovsk ətrafında, həmçinin Qrişino, Rodinskoye, Belitskoye, Suxetskoye, Mirnoqrad, Rovnoye, Kotlino, Udaçnoye və Molodetskoye yaxınlığında hücum əməliyyatlarını davam etdirib.

Bundan əlavə, Ukrayna hərbçilərinin Dobropolye taktiki rayonunda – Dorojnoyedən cənub-qərbdə mövqelərini möhkəmləndirdiyi və ya irəlilədiyi bildirilir.

Digər tərəfdən, Ukrayna Silahlı Qüvvələrinin "Şərq" qoşun qruplaşması Rusiyanın Donetsk vilayətinin Privolye qəsəbəsini ələ keçirməsi barədə iddialarını təkzib edib. Hərbçilər bu yaşayış məntəqəsinin Ukraynanın nəzarətində olduğunu bildiriblər. Slavyansk istiqamətində isə Zakitnoye qəsəbəsi uğrunda müdafiə döyüşlərinin davam etdiyi vurğulanıb.

Cənub istiqamətində isə vəziyyət gərgin olaraq qalır. Ukrayna Cənub Müdafiə Qüvvələrinin sözçüsü Vladislav Voloşin bildirib ki, Rusiya itkilər səbəbindən Xerson istiqamətindən Qulyaypole və Orexov bölgələrinə desant qüvvələri köçürür.

"DeepState" analitik layihəsinin məlumatına görə isə Ukrayna Müdafiə Qüvvələri Qulyaypoledə geri çəkilmək məcburiyyətində qalıb. Hazırda şəhərin qərb hissəsində döyüşlər gedir və bölgədə sabit təmas xətti mövcud deyil.