Azərbaycanla sülh müqaviləsinin razılaşdırıldığı bir vaxtda Rusiyaya bağlı qüvvələrin Ermənistanda fəallaşması diqqət çəkir. Kremlin İrəvanda ruspərəst dairələri aktivləşdirərək Zəngəzur dəhlizi (TRIPP layihəsi) ilə bağlı əldə edilən razılaşmanın ləğvinə və ABŞ-ın Cənubi Qafqaza daxil olmasının qarşısını almağa çalışdığı bildirilir.

Ermənistanın keçmiş prezidenti Robert Köçəryanın oktyabrın 7-də keçirdiyi 4 saatlıq mətbuat konfransında partiyasının parlament seçkilərinə qatılacağını açıqlaması bu təşəbbüsün ilk addımı kimi qəbul edilir. Ardınca baş nazir Nikol Paşinyanın Köçəryan və digər keçmiş liderləri debata çağırması isə xüsusi maraqla qarşılandı.

Azərbaycana və Paşinyana qarşı revanşist mövqe sərgiləyən bu qüvvələr kilsə ilə birləşərək Ermənistanda hakimiyyət dəyişikliyi edə bilərmi?

Globalinfo.az-a danışan politoloq Sultan Zahidov bildirib ki, Köçəryan çıxışında Paşinyanı, Ermənistanın xarici siyasətini, Tramp dəhlizini və Vaşinqton bəyannaməsini sərt şəkildə tənqid edib:

“O, 8 avqust tarixində Vaşinqtonda imzalanan deklorasiyanın heç bir nəticə vermədiyini söyləyib və TRIPP layihəsini Ermənistan üçün faydasız adlandırıb. Keçmiş prezidentin sözlərinə görə, Ermənistan bu dəhlizə nəzarət etməyəcək və layihə ölkəyə heç bir iqtisadi üstünlük qazandırmayacaq. Köçəryan ABŞ-ın Cənubi Qafqazda iqtisadi maraqlarının olmadığını da vurğulayıb. Əgər Tramp dəhlizi Çin və Avropa arasında logistikanı inkişaf etdirəcək bir layihədirsə, Vaşinqton bunu niyə dəstəkləsin?

Köçəryanın çıxışında Paşinyana qarşı açıq kin və nifrət hiss olunurdu. O, qarşıdakı seçkilərdə komandası ilə birlikdə iştirak edəcəyini açıqlayıb və Paşinyanın qalib gəlmə şansının sıfıra bərabər olduğunu bildirib. Hətta üstüörtülü şəkildə Ermənistanda inqilabın baş verə biləcəyini də istisna etməyib.

Keçmiş prezidentin bu ritorikası yeni deyil. Lakin onun qəfil fəallaşması diqqətçəkicidir. Yay aylarında Ermənistanda müəyyən hadisələr baş verdi: kilsə ilə hökumət arasında konfrontasiya yaşandı, iki nəfər həbs olundu. Erməni əsilli rusiyalı iş adamı Samvel Karapetyan Ermənistana qayıtdı və baş nazirə qarşı sərt bəyanatlar verdi. Lakin o da həbs edildi, həmin müddətdə isə Köçəryan səhnədə yox idi”.

Politoloq qeyd edir ki, Köçəryanın fəallaşması onun təxminən bir ay öncə Moskvaya səfərindən sonra başlayıb:

“O, Kremlin erməni məsələləri üzrə kuratoru Sergey Kiriyenko ilə görüşüb. Bu görüşdə Ermənistandakı vəziyyət və seçki öncəsi mühit müzakirə olunub. Hətta Köçəryanın maddi dəstək istədiyi də ehtimal edilir. Rusiya Ermənistanda geosiyasi oyunlarını davam etdirir və Paşinyanın devrilməsində maraqlıdır. Bu mənada keçmiş prezident Moskvanın düşündüyü ilk alternativlərdən biridir.

Beləliklə Paşinyanın qarşısında ciddi daxili müqavimət formalaşır. Kilsə ilə qarşıdurma onun ictimai nüfuzuna mənfi təsir edib. Son rəy sorğularına əsasən, Paşinyanın reytinqi aşağı düşüb, o, seçkilərə qədər ciddi addımlar atmalıdır. Robert Köçəryan təkbaşına Nikol Paşinyanı məğlub edə bilməz. Ermənistan cəmiyyəti onu diktator və korrupsiyaya bulaşmış bir şəxs kimi tanıyır. 2008-ci il mitinqlərində baş verən ölümlərlə bağlı ona bu gün də suallar ünvanlanır. Lakin əgər Köçəryanın partiyası digər müxalif partiyalarla birləşərsə, bu, Paşinyan üçün real təhlükəyə çevrilər”.

Politoloqun sözlərinə görə, daxili qarşıdurmalarla yanaşı, xarici güclər də Ermənistanda mövqe qazanmaq üçün müxtəlif oyunlar oynayır:

“Bu səbəbdən Ermənistanın indiki durumda böhrandan çıxara biləcək güclü liderə ehtiyacı var. Təəssüf ki, bu lider hazırda ortada görünmür. Paşinyan administrasiyası isə həm daxildəki nüfuzunu bərpa etməli, həm də digər siyasi partiyalarla ortaq məxrəcə gəlməlidir”.