Ermənistanda kilsə və hakimiyyətin qarşıdurması açıq müstəviyə keçir. Və bu qarşıdurmada əsas motiv Qarabağ məsələsidir. II Qaregin Ermənistanın daxili parçalanma təhlükəsi ilə üzləşdiyini bildirib. İddia edib ki, Qarabağı da buna görə “itiriblər”. Və bütün erməniləri Azərbaycana qarşı mübarizəyə səsləyib. Kilsənin erməni terroru və iddialarında əsas rol oynadığını nəzərə alsaq, Qareginin çağırışının Azərbaycan-Ermənistan sülh danışıqlarına ciddi problem yarada biləcəyi görünür. Paşinyan hakimiyyəti Qareginin mövqeyini qəbul etməsə də, kilsənin bu çağırışı erməni revanşizminin davam edəcəyindən xəbər verir. Hətta sülh sazişi imzalansa belə, erməni iddialarının davam edəcəyi istisna deyil.

Politoloq İlqar Vəlizadə məsələ ilə bağlı Publika.az-a açıqlamasında qeyd edib ki, kilsənin arxasında diaspor dayanır:

“Diasporun yanında da çox təsirli və imkanla dairələr var. Proses də belə hesablanıb ki, daxili siyasətdə gərginlik yaransın. Məqsəd cəmiyyətdə qarşıdurmanın çox olmasıdır. Bunların nəticəsində də siyasi böhran yaranacaq. Belə ki, revanşist qrupları hakimiyyətə gətirmək istəyirlər.

Çünki siyasi qrupların rəhbərləri və başçıları bu vəzifənin öhdəsindən gələ bilmədilər. Bunlara Robert Koçaryan və Serj Sarkisyan aiddir. Ona görə də indi revanşist qruplar kilsənin əli ilə hərəkətə keçiblər. Bütün bunların fonunda Paşinyan sülh müqaviləsini tezləşdirməlidir. Bu proses nə qədər uzansa, revanşistlər bir o qədər aktivləşəcək. Yəni sülh müqaviləsi imzalanmalıdır ki, bütü bu cəhdlər uğursuz olsun, nəticə verməsin. Əslində Paşinyan sülh müqaviləsinin tezləşməsi üçün imkanlar yaradır, nəinki uzadılması üçün”.

Aysel Şahmar