Çin Prezidenti Si Cinpin və Türkiyə Prezidenti Rəcəb Tayyib Ərdoğan arasında baş tutan görüşdən sonra yayılan məlumatlar ciddi müzakirələrə səbəb olub. Tərəflərin 3 milyon uyğur türkünün Türkiyəyə köçünü müzakirə etdikləri bildirilir.

Məlumata görə, həmin şəxslər Türkiyədə məskunlaşdırılaraq əkinçilik və xidmət sektoruna yönəldiləcəklər. Bununla Şərqi Anadoluda türk əhalinin azalmasının qarşısının alınacağı iddia edilir.

Bu, nə dərəcədə mümkündür? Belə bir addım Türkiyə ictimaiyyətində necə qarşılanacaq və iqtisadiyyatına hansı şəkildə təsir göstərəcək?

Globalinfo.az-a danışan türkiyəli politoloq Hasan Oktay deyib ki, Türkiyə Şanxay Əməkdaşlıq Təşkilatının (ŞƏT) Çində keçirilən sammitinə dialoq tərəfdaşı çərçivəsində geniş heyətlə qatılıb:

“Prezident Ərdoğan iclasda iştirak edən liderlərlə görüşdü. Əvvəlcə Azərbaycan Prezidenti İlham Əliyev, Ermənistanın Baş naziri Nikol Paşinyan, Rusiya Prezidenti Vladimir Putin və Pakistanın Baş naziri Şahbaz Şəriflə bir araya gəldi. Daha sonra isə Çin prezidenti və nümayəndə heyəti ilə geniştərkibli görüş keçirdi. Bu görüşlə bağlı rəsmi açıqlama da yayımlandı.

Həmçinin oxuyun:
Gündəmi silkələyəcək iddia: azərbaycanlılar bura köçürülə bilər – Sensasion

Daha əvvəl ölkədə xüsusilə tanınmış professorlar İlber Ortaylı və Erhan Afyoncunun, “Türkiyədə əhali azalır, Şərqi Anadoluda kənd təsərrüfatı bitib, Çindən uyğurlar gətirib burada yerləşdirmək lazımdır”, – kimi fikirləri ciddi müzakirə olunurdu. Daha sonra isə Ərdoğanla Si Cinpinin Şanxay görüşündə bu mövzudan danışdığına dair xəbərlər yayıldı. Rəsmi açıqlamada isə belə bir şey olmadığı bildirildi və Türkiyənin Prezident Administrasiyasına bağlı Dezinformasiya ilə Mübarizə İdarəsi Çindən 3 milyon uyğurun gələcəyi barədə xəbərin yalan olduğunu açıq şəkildə ifadə etdi”.

Politoloq bildirib ki, belə bir bir hal yaşanarsa, Çinin uyğurlara təzyiq göstərdiyi və onların ölkələrindən ayrılmaq istədiyi fikri təsdiqlənmiş olar:

“Türkiyədə bu məsələyə qarşı çıxan bəzi qruplar mövcuddur, çünki uyğurların Şərqi Anadolu bölgəsinə yerləşdiriləcəyi iddiaları müzakirə edilir. Ölkədə separatçı terror təşkilatına bağlı bəzi marksist kökənli vətəndaşlar hökumətin Şərqi Anadolu bölgəsinin demoqrafik strukturunu dəyişdirəcəyi mövzusunu dilə gətirərək müqavimət yaratmağa çalışırlar. Çünki həmin separatçı marksist təşkilatların hazırda istifadə edə biləcəyi başqa mövzu qalmayıb və ona görə də bu məsələni gündəmə gətiriblər.

Türkiyədə kənd təsərrüfatı və heyvandarlığın səhv siyasət nəticəsində sona gəldiyi gerçəyi nəzərə alınarsa, bu sahədə təcrübəsi olan 3 milyon insanın Şərqi və Cənub-Şərqi Anadolu bölgələrinin geniş torpaqlarında məşğulluğa cəlb olunması iqtisadi baxımdan ciddi rahatlama gətirə bilər. Nəticədə kənd təsərrüfatı və heyvandarlıq məhsullarını idxal edən Türkiyə bu dəfə ixrac sahəsində ciddi imkanlara sahib olar”.