Çin Xalq Respublikasının Sədri Si Cinpin Tiencin şəhərində Türkiyə Prezidenti Rəcəb Tayyib Ərdoğanla görüşüb.

Publika.az xəbər verir ki, bu barədə CCTV məlumat yayıb.

Si Cinpinin sözlərinə görə, Çin və Türkiyə qlobal Cənubun inkişaf edən və mühüm ölkələridir, müstəqillik və özünə güvən ruhuna malikdirlər. Onların münasibətlərinin qorunması regionun maraqlarına uyğundur.

“Gələn il Çin və Türkiyə arasında diplomatik münasibətlərin qurulmasının 55 illiyi tamam olur. Hər iki tərəf bu fürsətdən istifadə edərək ikitərəfli əlaqələri yeni mərhələyə çıxarmalıdır”, — deyə Si vurğulayıb.

O, Ərdoğana ikitərəfli münasibətlərin üç əsas istiqamətini inkişaf etdirməyi təklif edib:

- Qarşılıqlı siyasi etimadı gücləndirmək və Pekinlə Ankaranı narahat edən məsələlərdə bir-birini dəstəkləmək;
- “Bir kəmər - bir yol” təşəbbüsü, “Çin-Avropa” dəmir yolu ekspresi və Transxəzər beynəlxalq nəqliyyat marşrutu kimi layihələr çərçivəsində əməkdaşlığı dərinləşdirmək;
- G20, ŞƏT və BMT çərçivəsində əməkdaşlıq etmək.
Ərdoğan bildirib ki, Türkiyə Çinlə münasibətlərin inkişafına böyük əhəmiyyət verir, ikitərəfli əlaqələri genişləndirməyə hazırdır və “vahid Çin” prinsipinə sadiq qalacaq.