Azərbaycan Prezidenti İlham Əliyev Çin Xalq Respublikasında işgüzar səfərdədir. Avqustun 31-də səfər çərçivəsində dövlət başçısı Çin Xalq Respublikasının Sədri Si Cinpinlə görüşüb. Görüş zamanı iki ölkə arasında siyasi, iqtisadi və nəqliyyat sahələrində əməkdaşlıq məsələləri müzakirə olunub.

Prezidentin Çin səfəri iki ölkə arasında iqtisadi və siyasi münasibətlərə hansı yeni impuls verə bilər? Keçirilən görüşün nəticələri Azərbaycan–Çin strateji tərəfdaşlığının gələcək inkişafına necə təsir göstərəcək?

Globalinfo.az-a danışan politoloq Zaur Məmmədov deyib ki, iki ölkə arasında münasibətlər ardıcıl inkişaf edir:

“Bu gün Azərbaycan qlobal miqyasda mühüm geoiqtisadi layihələr həyata keçirir və Uzaq Şərq ölkələrinin maraqlarını beynəlxalq platformalarda gündəmə gətirir. Coğrafi baxımdan kiçik olmasına baxmayaraq, Cənubi Qafqazdakı proseslərə bütün böyük güclər diqqət yetirir. Öz maraqlarını həyata keçirmək istəyən tərəflər üçün Bakı ilə əməkdaşlıq zəruri hesab olunur ki, bu da Azərbaycanın strateji əhəmiyyətini bir daha sübut edir”.

Politoloq bildirib ki, Prezident İlham Əliyev bundan əvvəl də Çinə səfər edib və yüksək səviyyədə qarşılanıb:

“Hazırda isə dövlət başçısının Şanxay Əməkdaşlıq Təşkilatı çərçivəsində keçirilən tədbirdə iştirakı Çin lideri ilə dialoqun davam etdiyini göstərir. Görüşün məqsədi Zəngəzur dəhlizi, Cənubi Qafqazdakı proseslər, eləcə də Orta Asiya, Xəzər hövzəsi, Qara dəniz və Anadolu üzərindən Avropaya yönələn yükdaşımalarla bağlı müzakirələrin aparılmasından ibarətdir.

Azərbaycan–Çin iqtisadi və nəqliyyat əlaqələri ilbəil genişlənir. Statistik göstəricilər də bu əməkdaşlığın yüksələn xətt üzrə inkişaf etdiyini təsdiqləyir. Bununla yanaşı, iki ölkə beynəlxalq təşkilatlarda da bir-birini dəstəkləyir və qarşılıqlı etimada əsaslanan siyasət yürüdür.

Bu səfər yalnız Çinlə münasibətlərin möhkəmlənməsi baxımından deyil, həm də digər dövlətlərlə gələcək əməkdaşlıqların inkişafı üçün əhəmiyyətli hesab olunur. Nəticədə siyasi məsələlər üzrə daha aydın mövqelər formalaşacaq, yeni imkanlar və perspektivlər ortaya çıxacaq”.