Hindistan Müdafiə Nazirliyi “Agni-5” orta mənzilli ballistik raketi sınaqdan keçirdiyini açıqlayıb. Odişadakı İnteqrasiya Sınaq Poliqonundan buraxıldığı bildirilən raketin 5000 kilometr mənzilə sahib olduğu, Asiyanın böyük hissəsini əhatə edə biləcəyi iddia edilir.

Publika.az Türkiyə mətbuatına istinadla xəbər verir ki, Hindistan “Agni-5” ilə xüsusilə Çin və Pakistana qarşı çəkindirici gücünü böyütməyi hədəfləyir.

Bu raket Hindistanın raket proqramında mühüm mərhələ hesab olunur. Raketin uzunluğu təxminən 17,5 metr, diametri 2 metr, çəkisi isə 50 min kiloqramdır. Onun üç pilləli bərk yanacaqlı hərəkət sistemi artan məsafə və etibarlılığı təmin edir.

Raketin Hindistan Strateji Qüvvələr Komandanlığının inventarına daxil ediləcəyi gözlənilir. Bu proses başa çatdıqdan sonra “Agni-5” Hindistan-Sakit okean mühitində Hindistanın əsas elementinə çevriləcək.

Hindistan mediası bununla bağlı yayımladığı xəbərlərdə əsas hədəfin Türkiyə, Pakistan və Çin olduğunu yazıb. Təxribat xarakterli xəbərlərdə “Türkiyədən Çinə qədər hər yeri əhatə edən nüvə qabiliyyətli raket” və “Bütün Çin, Pakistan və Türkiyəni əhatə edən” kimi ifadələr yer alıb.