Neft-qaz şirkəti BP Plc Azərbaycandan gətirilən neftin bəzilərində çirklənmə aşkar edib.
Bakupost.az xəbər verir ki, bu barədə “Blumberq” agentliyi məlumat yayıb.
Məlumata görə, problemlər böyük miqdarda neft emalı zavodlarına və avadanlıqlara zərər verə bilən üzvi xloridlərlə bağlıdır.
İtaliyanın “Eni SpA” şirkəti də çirklənmiş neft aldığını və bəzilərinin hətta neft emalı zavodlarına getdiyini bildirib.
Böyük həcmdə Azərbaycan nefti boru kəməri ilə Türkiyənin Aralıq dənizi sahilindəki Ceyhan limanına nəql olunur. BP boru kəmərinin tikintisini həyata keçirən BTC Co. şirkətini idarə edir.
“BTC Co.-ya BTC boru kəməri ilə göndərilən müəyyən xam neft daşınmalarında üzvi xloridlərlə bağlı potensial keyfiyyət problemi barədə məlumat verilib. BTC Co. şirkəti hazırda boru kəməri boyu bütün sahələrdə xam neftin keyfiyyətini qiymətləndirir”, - qeyd olunub.