Qarabağda yenidən yanğınların başlanması narahatlığa səbəb olub. Məlumata görə, hadisə Ağdam rayonunun Əliağalı, Yeni Qaralar, Ağdərənin isə Qazançı və Sırxavənd kəndləri ərazisində baş verib. Bildirilir ki, alov sürətlə ətrafa yayılır, minalar partlayır. Hazırda yanğınların söndürülməsinə iki helikopter cəlb edilib. Bundan əvvəl Laçında da oxşar hal müşahidə olunub. Belə ki, iki qardaşın səhlənkarlığı ucbatından böyük yanğın olayı yaşanıb. Hər iki hadisə vətəndaşlarda müəyyən suallar yaradıb. Hətta düşünülür ki, bu, bilərəkdən edilir.

Bu dəfə Qarabağda baş verən yanğına səbəb nədir? Təsadüfdürmü, yoxsa kimsə qəsdən “bu alovu qızışdırır”?

Globalinfo.az-a danışan deputat Aqil Abbas yanğının qəsdən törədilmədiyini düşünür:

“Fikrimcə, bu, təbii fəlakətdir. Hazırda o ərazilərdə erməni yoxdur. Ölkədə 2 milyona yaxın mina var. Ehtiyatsızlıqdan belə partlayışlar hələ çox olacaq. İnanmıram ki, kimsə qərəzli şəkildə yanğın törətsin”.

Təhlükəsizlik məsələləri üzrə ekspert Rəşad Rza isə deyib ki, yanğınlar bir neçə səbəbdən baş verir.

Onun sözlərinə görə, burada ehtiyatsızlıq əsas amillərdən biridir:

“Hətta yanğının qəsdən törədilməsi mümkünür. Bəzən ərazi yanan zaman onu söndürmək üçün qarşı tərəfdə olan yer də yandırılır. Böyük ərazilərdə yanğınlar məhz bu cür söndürülür. Amma hadisənin məqsədli şəkildə olması da mümkündür. Belə ki, bu yolla boş ərazilərdə minalar üzə çıxarılır və partladılır”.

Hazırda baş verən yanğınlara gəlincə, ekspert araşdırmaların davam etdiyini vurğulayıb:

“Yəqin istintaq yekunlaşdıqdan sonra ictimaiyyətə dəqiq açıqlama veriləcək və hadisənin necə baş verdiyi hər kəsə məlum olacaq. Burada erməni faktoru da ola bilər. Yanğının onlar tərəfindən törədilməsi mümkündür. Ermənilərin məqsədi bizə zərər vurmaq, hadisələri qızışdırmaqdır. Onsuz da bilirlər ki, ora boş ərazidir. Bu cür məqsədlərin olması danılmaz faktdır”.