Türkiyənin millətçi İYİ Partiyasının sədri, deputat Musavat Dərvişoğlunun parlamentə təqdim etdiyi yeni qanun layihəsi müzakirələrə səbəb olub.

Globalinfo.az xəbər verir ki, layihəyə əsasən, Ermənistanla sərhəddə yerləşən Əlican keçid məntəqəsinin adının “Talat Paşa” olaraq dəyişdirilməsi təklif edilir.

Məlumata görə, qanun layihəsini 28 deputat imzalayıb.

Təqdim olunan layihədə deyilir:

“Bu ad dəyişikliyi sadəcə bir simvol deyil, türk xalqının öz tarixi, qəhrəmanları və yaddaşı üçün ayağa qalxmaq iradəsinin təzahürüdür. Çünki milli qəhrəmanlarını unudan xalqlar zaman keçdikcə özləri də unudulur. Əlican sərhəd-keçid məntəqəsinin adının “Talat Paşa” olaraq dəyişdirilməsi həm də düşmən qarşısında möhkəm dayanan xalqın öz tarixi sərhəddini qoruması deməkdir. Bu addımın həm türk xalqının gənc nəsillərinə tarixi şüurun aşılanması, həm də dövlətin tarixi davamlılığını və şərəfli keçmişini xatırlatmaq baxımından böyük əhəmiyyət kəsb edir”.

Qeyd edək ki, Talat Paşa ermənilərin Osmanlıdan sürgünü prosesinin əsas simalarından sayılır. Ermənilər onu “soyqırımı” iddialarında əsas “günahkar” kimi göstərirlər. Talat Paşa 1921-ci ildə erməni Solomon Tehliryan tərəfindən qətlə yetirilib.

Sözügedən təklif Ermənistan KİV və ictimaiyyətində böyük narazılıq doğurub.