Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasında telefon danışığı baş tutub. Prezident Ərdoğan Donald Trampı Türkiyəyə səfərə dəvət edib.

Globalinfo.az xəbər verir ki, bu barədə məlumatı Türkiyə Prezident Administrasiyasının İctimaiyyətlə Əlaqələr İdarəsi yayıb.
Açıqlamada deyilir:

“Cənab Prezident Rəcəb Tayyib Ərdoğan ilə Amerika Birləşmiş Ştatlarının Prezidenti cənab Donald Tramp arasında telefon danışığı olub. Görüşdə Türkiyə-ABŞ ikitərəfli münasibətləri, eləcə də regional və qlobal məsələlər müzakirə edilib.”

Ərdoğan telefon söhbətində bildirib ki, Türkiyə başda müdafiə sənayesi olmaqla, ABŞ ilə bir çox sahədə əməkdaşlığı daha da inkişaf etdirmək üçün addımlar atmaqda qərarlıdır.

Prezident Ərdoğan Trampın münaqişələrin bitirilməsinə yönələn yanaşmasını dəstəklədiyini vurğulayıb. O, həmçinin İranla aparılan danışıqlar və Rusiya-Ukrayna müharibəsinin dayandırılması üçün göstərilən səyləri də təqdirlə qarşıladığını bildirib.

Danışıq zamanı Ərdoğan Qəzzada humanitar böhranın faciəvi səviyyəyə çatdığını, bölgəyə humanitar yardımın fasiləsiz çatdırılmasının və bu dramatik humanitar böhranın sona çatdırılmasının vacibliyini qeyd edib. O, atəşkəsin təmin olunması və daimi sülhün yaradılması üçün Türkiyənin əməkdaşlığa və hər cür dəstəyə hazır olduğunu vurğulayıb.

Türkiyə lideri Suriyanın ərazi bütövlüyünün qorunması və sabitliyin təmin olunması üçün Ankara hökumətinin səylərini davam etdirdiyini deyib. Ərdoğana görə, ABŞ-ın Suriyaya qarşı sanksiyaların yumşaldılmasına yönələn təşəbbüsləri bu prosesə töhfə verə bilər. O, sabit Suriya modelinin həm bölgənin, həm də dünyanın sülh və təhlükəsizliyinə xidmət edəcəyini bildirib.