İyunun 2-də Ermənistanın Zəngəzur vilayətinin Gorus bölgəsində Fransa konsulluğunun açılması birmənalı qarşılanmayıb. Hətta bu məsələnin Kremli ciddi şəkildə qəzəbləndirdiyi və 2023-cü ildən bu yana Qafanda Rusiya konsulluğunun açılmasını İrəvanın qəsdən ertələdiyi bildirilir.

Məlumata görə, Rusiyanın xarici işlər naziri Sergey Lavrov Ermənistan son səfərində Baş nazir Nikol Paşinyanla sərt danışıb və bu məsələnin qısa zamanda həll edilməli olduğunu söyləyib. Hətta Lavrovun Paşinyanı Qafanda rus konsulluğu açılmayacağı təqdirdə, Rostovda yerləşən Ermənistan konsulluğunun bağlanması ilə hədələdiyi deyilir.

İran və Fransadan sonra Zəngəzurda Rusiyanın da konsulluğu açıqlacaqmı? İrəvan hakimiyyəti niyə məhz bu ərazidə Moskva təmsilçilyinin olmasından çəkinir?

Globalinfo.az-a danışan deputat Elçin Mirzəbəyli deyib ki, Fransanın Gorusda konsulluq açmaq qərarı təkcə regional diplomatik balansı deyil, həm də Cənubi Qafqazda geosiyasi maraqlar toqquşmasını önə çıxarır:

“Bu addımın ardınca Rusiyanın reaksiyası gözlənilən idi. Moskva Zəngəzurda Fransa və İran kimi dövlətlərin möhkəmlənməsini strateji risk kimi dəyərləndirir. Qafanda rus konsulluğunun açılmasının davamlı olaraq ertələnməsi isə Kremlin narahatlığını daha da artırıb və bu səbəbdən məsələ artıq xəbərdarlıq və təzyiq mərhələsinə keçib.

Əgər Rusiya da bölgədə konsulluq açarsa, bu, Zəngəzur vilayətini böyük güclər arasında rəqabət məkanına çevirə bilər. Bu isə Ermənistan üçün həm diplomatik təzyiqləri artırır, həm də təhlükəsizlik müstəvisində risklər yaradır”.

Politoloq bildirib ki, Ermənistan hakimiyyətinin Rusiyanın bölgədə konsulluq açmasına ehtiyatla yanaşması təsadüfi deyil:

“Bu, həm Qərbə yaxınlaşma kursunun nəticəsidir, həm də Moskva ilə münasibətlərdəki gərginliyin əlamətidir. Ermənistan, mövcud geosiyasi reallıqların dəyişəcəyinə ümid edərək balanslı xarici siyasət yürütməyə çalışır, lakin bunu saxlamaq getdikcə çətinləşir.

Nəticə etibarilə Zəngəzur bölgəsində artan diplomatik fəallıq bölgənin gələcəyinə dair geosiyasi rəqabətin intensivləşdiyini göstərir. Ermənistan hökuməti bu rəqabətdə öz milli maraqlarını necə qoruyacağını hələ də tam müəyyənləşdirə bilməyib. Rusiya-Ukrayna müharibəsi fonunda, xüsusilə daxili təhlükəsizlik sahəsində Moskvanın nüfuzuna dəyən zərbələr, İrəvanın bu məsələdə daha sərbəst davranmasına zəmin yarada bilər”.