Moskva Qafan şəhərində Rusiya baş konsulluğunun açılması məsələsinin tezləşdirilməsi üçün Ermənistana təzyiq edir.

Teleqraf xəbər verir ki, bu barədə “Past” qəzeti məlumat yayıb.

Erməni nəşri yazır ki, məsələ uzun müddətdir müzakirə mövzusu olsa da, Ermənistan hakimiyyəti yekun qərarı gecikdirir:

“Baş nazir Nikol Paşinyana bütün kanallarla xəbərdarlıq edilib ki, baş konsulluq məsələsi yaxın vaxtlarda həll olunmasa, bunun sərt nəticələri olacaq.

Rusiyanın Qafanda konsulluğunun açılması məsələsi üç ilə yaxındır müzakirə edilir. 2023-cü ilin sentyabr ayından etibarən konsulluğun açılışına hazırlıq işlərinə cavabdeh olan aparıcı qrup Qafanda işləyir. Həmin ilin noyabrında Rusiya hökuməti Xarici İşlər Nazirliyinin Sünikdə (Qərbi Zəngəzur – red.) konsulluğun açılması təklifini təsdiqləyib. Uzun gecikmədən sonra Ermənistan Xarici İşlər Nazirliyi heç bir dəqiq cavab vermədən baş konsulluğun açılması məsələsinin müzakirə edildiyini açıqlamışdı.

Bu il aprelin 9-da Rusiya Xarici İşlər Nazirliyinin sözçüsü Mariya Zaxarova Moskvanın may ayına qədər Qafanda baş konsulluğun açılması məsələsinə aydınlıq gələcəyini gözlədiyini açıqlayıb. Zaxarovanın sözlərinə görə, strateji əhəmiyyətli bölgədə (Qərbi Zəngəzur) Rusiyanın mövcudluğunun ardıcıl şəkildə genişləndirilməsi həm Ermənistan, həm Rusiyanın, həm də regionun uzunmüddətli maraqlarına cavab verir.

Qafanda çoxdan İran konsulluğu fəaliyyət göstərir, Fransa konsulluğunun açılması məsələsi də müzakirə olunur. Bu məntiq onu deməyə əsas verirdi ki, Ermənistan hakimiyyəti Rusiyaya da konsulluq açmağa icazə verəcək. Amma Paşinyan hökuməti, ola bilsin, Qərbin təzyiqi ilə yekun qərar verməyib”.