Kollektiv Təhlükəsizlik Müqaviləsi Təşkilatına (KTMT) üzv ölkələr 2026-cı il üçün təşkilatın kollektiv təhlükəsizlik sisteminin komandanlıq-nəzarət orqanlarının, qüvvə və vasitələrinin hazırlanmasına dair planı təsdiqləyiblər.

Teleqraf xəbər verir ki, bu barədə Belarus Müdafiə Nazirliyinin mətbuat xidməti rəsmi teleqram kanalında məlumat yayıb.

Məlumata görə, bu qərar KTMT-yə üzv dövlətlərin Müdafiə Nazirləri Şurasının iclası zamanı qəbul olunub. Tərəflər “KTMT-nin kollektiv təhlükəsizlik sisteminin qüvvə və vasitələrinin 2026-cı il üçün komanda-nəzarət orqanlarının və birləşmələrinin birgə təlimi Planı”nı müzakirə edərək, yekdilliklə təsdiq ediblər.

Belarus Müdafiə Nazirliyi bildirib ki, planın əsas məqsədi üzv ölkələrin birgə müdafiə imkanlarının artırılması və böhran vəziyyətlərinə operativ reaksiya vermək üçün qarşılıqlı fəaliyyətin gücləndirilməsidir.

Qeyd edək ki, KTMT Rusiya, Belarus, Ermənistan, Qazaxıstan, Qırğızıstan və Tacikistanı birləşdirən hərbi-siyasi ittifaqdır və təşkilat üzv ölkələr arasında təhlükəsizlik sahəsində əməkdaşlığı təmin etməyi hədəfləyir.