Baş nazir Nikol Paşinyan Ermənistanla Azərbaycan arasında qısa müddətdə sülh müqaviləsinin imzalana biləcəyini deyib. O iddia edib ki, bütün daxili və xarici təxribatlara baxmayaraq, Ermənistan Respublikası ilə Azərbaycan Respublikası arasında müharibə yox, sülh olacaq. Bu il martın 13-də Azərbaycan və Ermənistan arasında sülh mətni üzrə razılığın əldə olunduğu açıqlanıb. Amma hələlik bu istiqamətdə fəallıq yoxdur. Bu mənada Paşinyanın sülhlə bağlı açıqlamlarına yanaşmalar heç də birmənalı deyil.

Mövzu ilə bağlı Teleqraf-a açıqlamasında Milli Məclisin İctimai birliklər və dini qurumlar komitəsinin sədri, deputat Fazil Mustafa sülhlə bağlı bu cür açıqlamaların faydalı olduğunu deyib.

Onun fikrincə, Ermənistanda siyasi iradənin sülh istiqamətində olması müsbət haldır: “Təbii ki, buna mane olan kifayət qədər qüvvə var. Paşinyan özü də bununla mübarizə aparır. Bizə isə bu tezisin özü lazımdır. Yəni, "Ermənistanın hər hansı müharibə iddiası yoxdur" realığı məqbul durumdur. Bu olduqda isə digər məsələlərdə uzlaşma mümkün olacaq. Çünki belə bir iradənin olması önəmlidir”.

Fazil Mustafa hesab edir ki, əslində, Paşinyanın son mesajları müharibə ilə məsələləri həll etməyin mümkünsüzlüyünə işarədir: “Mütləq ki, bu istiqamətdə ağıllı davranışın olması vacibdir. Ermənistan da yəqin ki, bu yolu izləyəcək. Hər halda bu cür açıqlamlar ümumi işin nəticəsini ortaya qoyur. Azərbaycan qələbə qazanmasaydı, Ermənistan tərəfi belə bir qəti hökmlə çıxş etməyəcəkdi. Onlar artıq müharibənin nəticələrini proqnozlaşdıra bilirlər”.

Beynəlxalq Münasibətlərin Təhlili Mərkəzinin eksperti Mətin Məmmədli isə Paşinyan və digər erməni rəsmilərinin davamlı olaraq sülh ritorikasından istifadə etmələrinə diqqət çəkib.

Ekspert bildirib ki, erməni tərəfinin “sülhə yaxınıq, müqavilə imzalamaq niyyətindəyik” kimi açıqlamaları reallığı əks etdirmir: “Yekun sülh sazişinin imzalanması üçün praktiki addımlar atılmalıdır. Faktiki olaraq, Ermənistan hökuməti tərəfindən bu addımların atıldığını görmürük. Azərbaycan sülh müqaviləsinin imzalanması üçün Ermənistan qarşısında qoyduğu haqlı tələblər var. Bu Ermənistan konstitusiyasından Azərbaycana qarşı olan ərazi iddialarının aradan qaldırılması və ATƏT-in Minsk qrupunun ləğvi ilə bağlıdır. Rəsmi İrəvan isə bu məsələlərin həlli ilə bağlı ciddi addımlar atmır”.

Ekspret əlavə edib ki, buna paralel olaraq erməni tərəfi iki ölkə arasındakı şərti sərhəddə təxribatlara əl atır: "Atəşkəs rejiminin pozulması, Azərbaycan Ordusunun mövqelərinin atəşə tutulması faktları mövcudur. Eyni zamanda Ermənistan daxilində revanşizm meyilləri güclənir və bu ölkə sürətlə silahlanır. Bütün bunlar isə Ermənistan hakimiyyətinin sülh ritorikası ilə ziddiyyət təşkil edir. Bu baxımdan da Paşinyan komandasının sülhlə bağlı açıqlamları səmimi qəbul edilmir”.