Rusiya Prezidenti Vladimir Putin Ukraynadakı vəziyyətin danışıqlar yolu ilə həllinə nail olmaq istədiyini bildirib.

Publika.az xəbər verir ki, o, bu barədə amerikalı jurnalist Taker Karlsona müsahibəsində bildirib.

Dövlət başçısı qeyd edib ki, Ukrayna Prezidenti Volodimir Zelenski Rusiya ilə danışıqları qadağan edən fərman verib. Onun sözlərinə görə, Ukrayna lideri bu fərmanı ləğv etməlidir.

"Biz heç vaxt danışıqlardan imtina etməmişik. Biz hər zaman eşidirik: Rusiya hazırdırmı, hazırdır? Bəli, imtina etmədik! Onlar açıq şəkildə imtina etdilər. Yaxşı, fərmanını ləğv etsin, danışıqlara getsin. Biz heç vaxt imtina etməmişik”, - Rusiya lideri bildirib.

2023-cü ilin dekabrında Putin Rusiya tərəfinin Ukrayna ilə bağlı öz maraqları əsasında danışıqlar aparacağını bildirmişdi.

Bir müddət öncə Rusiyanın müdafiə naziri Sergey Şoyqu isə bildirib ki, Rusiyanın xüsusi hərbi əməliyyat (SVO) zamanı qalib gəlməkdən başqa variantı yoxdur.

Hüseyn İbadlı