Livan Silahlı Qüvvələri şimal və şərq bölgələrindən atılan atəşə cavab olaraq Suriya ərazisinə zərbələr endirib.

Publika.az xəbər verir ki, bu barədə Livan KİV-i məlumat yayıb.

"Ordu bölmələri atəş mənbələrinə müvafiq silahlarla cavab verib, yerləşdirməni sürətləndirib və təhlükəsizlik vəziyyətini nəzarətə götürüb", - məlumatda deyilir.

Bildirilib ki, Livanın şimalında Əl-Qəvva, Əl-Qəsr, Səhalat əl-Mey və Hoş Es-Sayed yaşayış məntəqələri yaxınlığında ən azı 50 mərmi partlayıb.

Qeyd olunur ki, martın 16-da “Əl-Nahar” qəzeti Suriya ərazisindən artilleriya atəşinə tutulduqdan sonra Suriya ilə sərhədin şimal və şərq hissələrində Livan qoşunlarının yüksək hazırlıq vəziyyətində olduğunu bildirib.

Suriya Daxili İşlər Nazirliyi insidentdə "Hizbullah" hərəkatının üzvlərini günahlandırıb. "Hizbullah"ın mətbuat xidməti isə bəyanat yayaraq Livan-Suriya sərhədində baş verən hadisələrdə iştirakını inkar edib.