“Minsk Qrupunun ayaqda qalmasını Ermənistandan çox, Fransa arzulayır. Faktiki olaraq bu ölkənin diplomatları qurumun fəaliyyəti ilə bağlı açıqlamalarla çıxış edirlər”.

Bu sözləri Globalinfo.az-a politoloq Zeynal Əmrəliyev deyib.

O bildirib ki, Paşinyan hakimiyyəti də Makronun bu oyunlarına alət olur:

“Minsk Qrupunun həll edəcəyi bir məsələ qalmayıb. Azərbaycan öz torpaqlarını azad edib və münaqişə bitib. Onların fəaliyyətini davam etdirməsi ilə sanki münaqişənin hələ bitmədiyi görüntüsünü yaratmağa çalışırlar.

İkinci bir məsələ isə budur ki, Fransa bir yolla özünü Azərbaycan və Ermənistan məsələsində vasitəçi tərəf kimi göstərmək istəyir. Bunun da ən optimal yolu məhz özünü ATƏT-in Minsk Qrupunun həmsədri kimi təqdim etməkdir. Ancaq təbii ki, Azərbaycan bununla razılaşa bilməz.

Ermənistan tərəfi həqiqətən sülh istəyirsə, bu oyunlara son verməlidir. Bu məsələ eyni zamanda ATƏT-in rəhbərliyinə də çatdırılmalıdır. Təşkilata hazırda kifayət qədər təcrübəli diplomat, uzun illər qardaş Türkiyədə mühüm diplomatik vəzifələrdə işləmiş, o cümlədən, bir müddət xarici işlər naziri olmuş Firudin Sinirlioğlu rəhbərlik edir.

Firudin bəy Azərbaycanı kifayət qədər gözəl tanıyır, ancaq Minsk Qrupunun ləğv edilməsi üçün hər iki dövlət – həm Azərbaycan, həm də Ermənistan ortaq ərizə təqdim etməlidir. Ermənistan tərəfi bu məsələni alver predmetinə çevirməyib Azərbaycanla birlikdə təşkilata müraciət etməlidir”.