Fransa erməni separatizminin Azərbaycan ərazisinə qayıdışının mümkün olmadığı fikrindən imtina etmək istəmir.

Teleqraf.com xəbər verir ki, bunu politoloq Elxan Şahinoğlu deyib.

Onun sözlərinə görə, Azərbaycan Prezidenti İlham Əliyev ATƏT sədri İan Borqu qəbul edərkən, Minsk qrupu və onunla əlaqədar olan bütün təsisatların ləğv edilməsinin zəruri olduğu fikrini bir daha xatırladıb:

“İlham Əliyev ATƏT sədri ilə əvvəlki görüşündə də, Minsk qrupunun tarixə qovuşduğunu söyləmişdi. Azərbaycan ərazi bütövlüyü və Qarabağ üzərində suverenliyini bərpa edib. Ermənistan mövcud reallığı qəbul edib. Belə olan halda keçmişdə Qarabağ probleminin həlli məqsədilə yaradılan və nəticə əldə etməyən Minsk qrupunun özünü buraxması barədə açıqlama niyə verilmir?

Minsk qrupunun keçmiş həmsədri olan Rusiyanın xarici işlər naziri Sergey Lavrov 2022-ci il iyunun 24-də azərbaycanlı həmkarı Ceyhun Bayramovla görüşündə “Minsk qrupu fəaliyyətini dayandırıb” açıqlamasını vermişdi. Minsk qrupunun digər həmsədri olan ABŞ də Minsk qrupuna ehtiyac görmür. ABŞ dövlət katibinin Qafqaz üzrə müşaviri Filip Riker 2022-ci ilin noyabrın 17-də verdiyi açıqlamada, faktiki Lavrovun sözlərini bu şəkildə təkrarlamışdı: “Minsk qrupu mexanizmi işləmir. Vaşinqton Azərbaycanla Ermənistan arasında sülh quruculuğuna dəstək verir”.

Beləliklə, Minsk qrupunun üç həmsədrindən ikisi bu təşkilatın fəaliyyətinə ehtiyac duymadığını bildirib. Ermənistan Baş naziri Nikol Paşinyan da mövcud reallıqları qəbul edərək, Minsk qrupunun adını heç yerdə çəkmir. Buna baxmayaraq, qrupun üçüncü həmsədri Fransa bu mövzuda mövqeyini açıqlamayıb. Bunun səbəbi məlumdur, Paris erməni separatizminin Azərbaycan ərazisinə qayıdışının mümkün olmadığı fikrindən imtina etmək istəmir. Minsk qrupu Fransanın Cənubi Qafqazda “varlığını” təmin edən yeganə format idi. Ona görə də bu formatdan imtina etmir. Ancaq Minsk qrupunun fəaliyyətini davam etdirməyin məntiqi qalmayıb”.

Elxan Şahinoğlu qeyd edib ki, Ukrayna müharibəsi fonunda ABŞ və Fransanın digər həmsədr Rusiya ilə dialoqunu davam etdirməsi də mümkün deyil:

“Minsk qrupu məsələsində tək qalan Fransa ATƏT-ə “Həmsədrlik formatı qalmalıdır” siyasətini diktə edə bilməz. ATƏT-in hazırkı sədri mövcud reallıqları qəbul edərək, qrupu buraxa bilər.

İan Borq İrəvandakı mətbuat konfransında erməni jurnalistin “ATƏT Qarabağ məsələsini bağladı? ATƏT geri dönüşü necə təsəvvür edir” sualına belə cavab verib: “ATƏT özünün iştirak etmədiyi prosesə daxil ola bilməz və iki ölkənin mövqeyinə hörmətlə yanaşır”.

Əslində bu cavab ondan xəbər verir ki, ATƏT sədri də Minsk qrupuna ehtiyac olmadığına işarə edib, sadəcə bunu rəsmiləşdirmək lazımdır”.

Müəllif: Mənsur Rəğbətoğlu