“Ermənistan sülh müqaviləsinin mətnini razılaşdırdıqdan sonra israrlı şəkildə Azərbaycanın digər iki tələbini yerinə yetirmədən sənədi imzalamaq istəyir”.

Bu sözləri Globalinfo.az-a politoloq Oqtay Qasımov Bakı və İrəvan arasında sülh danışıqları prosesinin son durumu ilə bağlı deyib.

O bildirib ki, Ermənistan XİN rəhbəri Ararat Mirzoyanın Antalyada keçirilən Diplomatiya Forumundakı açıqlamaları qeyri-konstruktiv davranışların davamıdır:

“O deyir ki, razılaşdırılmış 17 maddəlik sülh sənədini imzalamağa hazırdır. Lakin bunun Ermənistan konstitusiyası dəyişdirilmədən baş tutmalı olduğunu qeyd edib. Bu isə Azərbaycanın prosesin əvvəlindən bəri qəti şəkildə müdafiə etdiyi mövqeyə ziddir.

Bununla yanaşı, beynəlxalq səviyyədə Azərbaycana qarşı təzyiq kampaniyasını həyata keçirməyə çalışır. Rəsmi Bakı İrəvanın bu niyyətlərini yaxşı bilir. Bu baxımdan, təmkinli və israrlı şəkildə öz mövqeyindən geri çəkilmir. Ermənistan konstitusiyası dəyişmədən sülh müqaviləsinin imzalanmayacağını da bəyan edir. Bu, çox önəmli mövqedir”.

Politoloq qeyd edib ki, İrəvan bəzi himayədarlarının göstərişlərini yerinə yetirərək prosesi uzatmağa çalışır:

“Məqsəd budur ki, vaxtı uzatmaqla gələcəkdə bölgədə baş verə biləcək geopolitik dəyişikliklər fonunda öz mənafeyi naminə revanşist cəhdlər etsin.

Şərti sərhəddə atəşkəsin pozulması, Ermənistanın sürətlə silahlanması və s. bu vahid siyasətin tərkib hissəsidir. Azərbaycan bunları çox yaxşı bilir və haqlı mövqeyindən geri çəkilmir. Ermənistan sülh müqaviləsinin imzalanması üçün tələb olunan şərtləri yerinə yetirməlidir: Konstitusiya dəyişməli, ATƏT-in Minsk qrupu buraxılmalıdır. Əks halda, Ermənistan üçün uğurlu gələcək gözlənilmir”.