“Suriyada Bəşər Əsəd rejimi devrildikdən sonra oradakı qaydalar dəyişib və yeni reallıqlar yaranıb. Bu yeni reallıqlar nəticəsində Türkiyə Suriyada bir neçə mühüm nəticəyə nail olub”.

Bu sözləri Globalinfo.az-a siyasi şərhçi Kənan Novruzov Türkiyə Prezidenti Rəcəb Tayyib Ərdoğanın Suriyaya səfəri ilə bağlı danışarkən deyib.

O bildirib ki, hazırda Rusiya və İsrailin Suriyada təsir imkanları zəifləyib, Türkiyənin isə təsir imkanları artıb:

“Bunların fonunda Türkiyənin təhlükəsizlik qayğıları təmin olunub. Çünki rəsmi Ankara uzun illərdir, PKK/YPG və İŞİD kimi terror təşkilatlarına qarşı mübarizə aparırdı. Həmin terror təşkilatlarının əsas bazaları Suriyada və İraqın şimalında idi. Əsəd rejimi Türkiyənin həmin terrorçulara qarşı mübarizəsində Ankaraya dəstək vermirdi. Hakimiyyət dəyişikliyindən sonra, görünür, Suriya Türkiyə ilə əməkdaşlıqda konstruktiv mövqe ortaya qoyub. Hətta hakimiyyət dəyişikliyindən əvvəl bununla bağlı razılıq əldə olunmuş, Əhməd ər-Şaradan vəd alınmışdı. Vədin müqabilində onun hakimiyyətə gəlişi üçün dəstək də verildi. Bundan sonra Dəməşq-Ankara münasibətlərində yeni mərhələ başlandı. Türkiyənin yüksək səviyyəli rəsmilərinin Suriyaya səfəri baş tutdu. Ardınca Əhməd ər-Şara IV Antalya Diplomatiya Forumunda iştirak etmək məqsədilə Türkiyəyə getdi”.

K.Novruzovun sözlərinə görə, Ərdoğanın Suriyaya səfəri diplomatik etiket baxımından gözləniləndir:

“Səfərin tarixi açıqlanmayıb, çox güman ki, müəyyən məsələlər razılaşdırılıb, düzgün məqam seçiləcək. Səfər təkcə ikitərəfli xarakter daşımır. Burada İsrail, Rusiya və ABŞ-ın Suriya ilə bağlı mövqeləri nəzərə alınacaq. Beləliklə, Suriya səfəri çərçivəsində konkret məsələlər müzakirə edilə bilər. Növbəti proses İsrailin Suriya ilə bağlı planlarının qarşısının alınması olacaq. Türkiyənin Suriya ilə təmasları İsraillə birbaşa toqquşmanın qarşısının alınmasına hesablanıb. Rəsmi Ankara özünün təhlükəsizlik maraqları naminə İsraillə qarşıdurmadan da çəkinməyəcək. Lakin hazırkı məqamda bunun baş tutması gözlənilmir”.