“Prezident İlham Əliyev və Prezident Rəcəb Tayyib Ərdoğan arasında Antalyada keçirilən görüş həm ikitərəfli münasibətlərin möhkəmləndirilməsi, həm də regional və beynəlxalq məsələlərin müzakirəsi baxımından böyük əhəmiyyət daşıyır”.

Bu sözləri Globalinfo.az-a Yaxın Şərq üzrə ekspert Vüqar Zifəroğlu deyib.

O bildirib ki, görüşdə iki ölkə arasında “qardaşlıq və müttəfiqlik münasibətləri”nin inkişafından məmnunluq ifadə olunması 2021-ci ildə imzalanmış Şuşa Bəyannaməsinin ruhunu əks etdirir:

“Görüş bu xəttin davam etdiyini və daha da dərinləşdirildiyini göstərir. Cənab Prezidentin Antalyadakı diplomatik foruma qatılması və bu tədbiri “dünyanın aparıcı platformalarından biri” adlandırması, Azərbaycanın beynəlxalq dialoqa və çoxtərəfli əməkdaşlığa verdiyi önəmi nümayiş etdirir. Bu, eyni zamanda, Azərbaycan diplomatiyasının regional və qlobal gündəmdə fəal rol oynamaq niyyətinin göstəricisidir.

Həmçinin vurğulamaq lazımdır ki, Cənubi Qafqaz və Yaxın Şərqdəki proseslərin müzakirəsi tərəflərin bu regionlarda sabitlik və təhlükəsizliklə bağlı ortaq mövqeyə malik olduğunu göstərir. Xüsusilə Cənubi Qafqazda sülh prosesinin getdiyi bir dövrdə Ankara və Bakının koordinasiyalı hərəkət etməsi proseslərin uğurla nəticələnməsi baxımından vacibdir”.

Politoloq qeyd edib ki, bu görüş təkcə simvolik deyil, həm də praktik nəticələr doğura biləcək diplomatik hadisədir:

“Türkiyə və Azərbaycanın bir-birinə qarşılıqlı dəstək göstərməsi, regional sabitlik və inkişaf üçün güclü platforma yaradır. Eyni zamanda, belə görüşlər beynəlxalq ictimaiyyətə bu ittifaqın gücünü və davamlılığını nümayiş etdirir”.