Prezident İlham Əliyev ADA Universitetində keçirilən “Yeni dünya nizamına doğru” mövzusunda beynəlxalq forumda çıxışı diqqətçəkəndir. Burada bir sıra məsələlər, xüsusilə də Azərbaycan-Ermənistan, ABŞ-Ermənistan münasibətləri haqqında müəyyən fikrilər səsləndirdi.

“Bayden-Blinken komandasına olan inamımız sıfıra gəlib çıxdı və münasibətlərimiz çox ağır böhrana düşdü. Bayden administrasiyası mövqeyini birmənalı olaraq Ermənistanla bağladı. Ermənistan-Azərbaycan münaqişəsi başladıqdan sonra biz bunu ilk dəfə gördük. Və Tramp administrasiyasının hakimiyyətə gəlməsi Ermənistanı məyus etdi. Tramp administrasiyasının siyasəti bölgə üçün mühümdür” – deyə, İlham Əliyev vurğulayıb.

Bu mesaj nəyə hədəflənib?

Globalinfo.az-a danışan politoloq Zaur İbrahimli deyib ki, Bayden administrasiyasının iqtidardan getməsi rəsmi Vaşinqtonla Bakı arasında münasibətlərin yeni mərhələsinin başlaması üçün müsbət zəmin yaradıb:

“Bayden administrasiyası erməni mərkəzli siyasət yürüdürdü. Heç bir strateji zərurət olmadan Ermənistanla münasibətlər ABŞ-ın Cənubi Qafqaz siyasətinin mərkəzi elementlərindən birinə çevrilmişdi. Ümumiyyətlə, Vaşinqtonun Cənubi Qafqaz siyasəti Ermənistanı dəstəkləmək və gücləndirmək ətrafında təmərküzləşmişdi. Bu isə regiondakı proseslərə və Azərbaycanın irəlilətdiyi sülh gündəliyinə ciddi ziyan vururdu. Ermənistanın birtərəfli şəkildə dəstəklənməsi Paşinyan iqtidarının sülh prosesindən yayınmasına səbəb olurdu. Həmçinin İrəvanda revanşist ideologiyanı gücləndirirdi. USAID-in də burada xüsusi rolu var idi. Onun rəhbəri Samanta Pauerin Ermənistana isti, doğma və xüsusi münasibəti heç kim üçün sirr deyil. Ötən il dekabrın 27-də seçkilərin nəticəsi məlum olmuşdu və Bayden administrasiyasının Ağ Evi tərk edəcəyi bəlli idi. Həmin vaxt Pauer ABŞ-ın Ermənistandakı səfirliyində görüş keçirdi, İrəvana dəstək bəyanatları verdi. Bayden administrasiyası getməsinə bir neçə gün qalmış planlaşdırılmamış strateji tərəfdaşlıq xartiyası imzaladı. Ermənistan ordusunun təlimlərə cəlb edilməsinin də şahidi olduq”.

Politoloqun sözlərinə görə, Donald Tramp administrasiyasının indiki dünyaya baxışı, sülhpərvər mövqeyi və Cənubi Qafqazdakı prosesləri obyektiv dəyərləndirmək istəyi ABŞ-Azərbaycan münasibətlərində sağlam düşüncənin ön plana çıxmasına imkan verir:

“Trampın hakimiyyətə gəlişindən sonra Azərbaycan və Ermənistan arasında sülh sazişinin mətni razılaşdırıldı. Bu, təsadüfi deyildi. Ermənilər müxtəlif bəhanələrlə prosesi uzadırdılar. Trampın proseslərə obyektiv yanaşacağına əmin olduqdan sonra buna razılıq verdilər. Sülh sazişi mətninin razılaşdırılması ilə bağlı martın 13-də dünya ictimaiyyətinə məlumat verildi.

ABŞ-Azərbaycan münasibətlərinin yenidən strateji tərəfdaşlıq səviyyəsinə yüksəldilməsi üçün kifayət qədər böyük zəmin var. ABŞ administrasiyası bu istiqamətdə addımlar atacaq. Azərbaycan Cənubi Qafqazda aparıcı rola malikdir. Rusiya və İranla həmsərhəd olan yeganə ölkədir. Azərbaycanın xarici siyasəti milli maraqlar çərçivəsində formalaşır dayanıqlığı və proqnozlaşdırıla bilməsi ilə seçilir. Donald Tramp administrasiyası da bu yanaşmaya üstünlük verir”.