Ermənistan rəsmilərinin son açıqlaması birmənalı qarşılanmayıb. Belə ki, Azərbaycanın guya apreldə hərbi əməliyyatlara başlayacağı haqda İrəvandan bəyanatlar səsləndirilir.

Bu məlumat niyə indi ortaya atıldı? Məqsəd, hədəf nə ola bilər?

Globalinfo.az-a danışan Milli Məclisin deputatı Elçin Mirzəbəyli xatırladıb ki, Brüsseldə ABŞ-ın o vaxtkı dövlət katibi Entoni Blinken, USAİD-in keçmiş rəhbəri Samanta Pouer, Avropa Komissiyasının prezidenti Ursula von der Leyen və Ermənistanın Baş naziri Nikol Paşinyanın iştirakı ilə üçtərəfli görüş keçirilmişdi:

“Bu görüşdə Ermənistana faktiki olaraq silah, sursat, hərbi texnika və digər sahələrdə yardımın göstərilməsi ilə bağlı razılıq əldə edilmişdi. Sülh Fondu adlanan, əslində isə müharibə fondu olan təşkilat çərçivəsində də Ermənistana yardımların edilməsi xüsusi olaraq qeyd olunmuşdu. O zamandan indiyə qədər müəyyən dəyişikliklər baş verib. Donald Trampın hakimiyyətə gəlişi ilə ABŞ-ın yardım siyasəti də hər kəsə məlumdur. Prinsip etibarilə ABŞ Ermənistana hər hansı yardımın verilməsinin tərəfdarı kimi çıxış etmir.

USAİD çərçivəsində Ermənistana göstərilən yardımlar da fakriki olaraq dayandırılıb. Son olaraq, Avropa sülh fonduna Ermənistana 10 milyon vəsait ayrılması ilə bağlı müraciət olunub. Bu dəstəyin verilib-verilməyəcəyi isə məlum deyil.

Ukrayna-Rusiya xəttində baş verən hadisələr Nikol Paşinyanı ehtiyatlı davranmağa məcbur edir. Aİ-yə üzvlüklə bağlı məsələlər qeyri-müəyyən vaxta qədər təxirə salınır, digər tərəfdən Rusiya ilə münasibətlərin normallaşması istiqamətində səylərin göstəriləcəyi bildirilir.

Ermənistan süni qarşıdurma yaradaraq Avropaya yardıma ehtiyacı olduğunu göstərməyə çalışır”.

maxresdefault 2
Əlimusa İbrahimov

Politoloq Əlimusa İbrahimov isə məsələyə belə münasibət bildirib:

“Ermənistanın Azərbaycanın hücum edəcəyinə dair bəyanatı ilk deyil. Dəfələrlə bu ölkə Azərbaycan “təhlükəsindən” istifadə edərək beynəlxalq gücləri rəsmi Bakıya qarşı qaldırmağa cəhd göstərib.
Bu gün Ermənistanda ciddi ajiotaj yaranır. Rəsmi İrəvanın boş yerə belə bəyanatlar verdiyini düşünmürəm. Yəni bunun arxasında müəyyən niyyətlər var. Ermənistan baş nazirinin səsləndirdiyi həmin fikirlər ölkə daxilində ciddi narahatlıq yaratmağa başlayıb. Paşinyan da bu narahatlıqdan öz məqsədləri üçün istifadə edir.

“Caliber”in hərbi əməliyyatlarla bağlı xəbərində də Ermənistanın hücuma hazırlaşması dəlillərlə sübut olunur. Rəsmi İrəvanın son vaxtlarda hücum silahları alması, bunu daha da artırması hücuma hazırlıq olduğunu göstərir. “Qara məni basınca, mən qaranı basım” deyən Ermənistan Azərbaycanın hücuma hazırlaşması istiqamətində bəyanatlar səsləndirməklə məşğuldur. Məqsəd isə öz hazırlıqlarını ört-basdır etmək, silah-sursat anbarını daha da genişləndirməkdir.

Ermənistan həmçinin xaricdəki qüvvələri də ətrafında cəmləşdirmək istəyir. Azərbaycan sözügedən prosesləri diqqətlə izləyir. Lazımi cavablar da veriləcək. Aprel, iyun aylarının diqqətə çatdırılmasının da səbəbləri var. Qlobal səviyyədə bu ayların çox ciddi təlatümlü olacağı gözlənilir”.