“İsrael Hayom” nəşrinin yaydığı məlumata görə, son günlər İsrail ordusu Suriya ərazisində fəaliyyətini gücləndirib. İsrail ordusu Suriya ərazisində fəaliyyətini gücləndirərək, nə hərbi zərurət, nə də dəqiq strategiya ilə dəstəklənən addımlar atır. Onların arasında Suriya ərazilərinin işğalı, Dəməşqin cənubunda hərbsizləşdirilmiş zonanın yaradılmasının elan edilməsi barədə bəyanatlar var.

İsrail Suriyada hərbi mövcudluğunu saxlaya bilərmi? Bunun nəticəsi necə olacaq?

Globalinfo.az-a danışan politoloq Natiq Miri deyib ki, son təxribat hadisələrinin arxasında bir-birinə antaqonist qüvvələr koordinasiyalı şəkildə fəaliyyətdədirlər:

“İran zaman-zaman İsraili düşmən elan edir. Məhv edəcəyini bildirir. Amma koordinasiyalı şəkildə bu təxribatın arxasındadırlar. İran və İsrail ayrı-ayrılıqda hərəkətə keçir. İran Əsəd rejiminin qalıqlarını silahlandırmaqla bərabər PKK terrorçularının Suriyadakı ünsürlərini dolayı yolla Əsəd rejiminin tərəfində döyüşmək üçün təhrik edir. Çünki təxribat törədənlər arasında PKK-nın Suriya qolu olan YPG terrorçuları da mövcuddur. Bu da böyük oyundan xəbər verir. Hiss olunur ki, məsələ İran və İsraillə məhdudlaşmır. ABŞ və Rusiyanın birgə Suriyadakı təxribat hadisələri ilə bağlı BMT Təhlükəsizlik Şurasında müzakirə predimentinə məsələni çıxartması bəzi niyyətləri ortaya qoyur. ABŞ və Rusiyanın geosiyasi maraqları ilk dəfə Suriyada toqquşmur, üst-üstə düşür. Bunu da İsrailin bir neçə gün öncə verdiyi açıqlamada aydın gördük. İddia edirdi ki, Rusiya Tartus limanında nəzarəti və Latakiada hərbi bazasını qorumalıdır. Bu məsələdə rəsmi Vaşinqton Moskvaya yardım etməlidir. Çox böyük oyunun getdiyinin şahidi oluruq. Qardaş Türkiyə də hərəkətə keçib. Regional ölkələri bir yerə toplamaqla İordaniyada məsələni ciddi müzakirə etdilər. Bu təxribatı qınamaqla bərabər Suriyadakı müvəqqəti hökumətə dəstəyi də bəyan etdilər”.

Politoloqun sözlərinə görə, Türkiyə, Suriya, İraq, Livan və İordaniya Suriyadakı İŞİD terroruna qarşı birgə plan qurublar:

“Bu da qısa müddət ərzində anti-terror əməliyyatının başlayacağına işarədir. Eyni zamanda ABŞ-ın Suriyadakı varlıq bəhanəsini əlindən alır. Rəsmi Vaşinqton hər zaman həmin terrorçular ilə mübarizənin olduğunu bildirir. Ancaq mübarizə aləti kimi istifadə etdiyi PKK/YPG terrorçularıdır. Bu isə absurd yanaşmadır. Bir terrorçu ilə digər terrorçuya qarşı mübarizə aparmaq inandırıcı deyil. Ona görə də Türkiyənin təşəbbüsü uzağa gedən planlardan xəbər verir. Suriyadakı bu təxribat müəyyən hüquqi zəmin yaratdı ki, təkcə Bəşər Əsəd rejiminin ünsürlərinə qarşı deyil, eyni zamanda PKK terrorçularına qarşı Türkiyə, İraqın şimalı, Suriya və digər bölgələrdə birgə mübarizə aparılsın. Nə İsrailin, nə ABŞ-ın, nə də Rusiya və İranın qurduğu yeni təxribat planlarının, müzakirələrin və çıxarılacaq qərarların regiona ciddi təsiri olacaq”.