Prezident İlham Əliyevin İğdır-Naxçıvan qaz kəmərinin videobağlantı formatında keçirilən açılış mərasimindəki çıxışı diqqət çəkib. Prezident Naxçıvanın qədim Azərbaycan torpağı olduğunu, artıq bir əsrdən çoxdur ölkənin əsas hissəsindən ayrıldığını vurğulayıb. Ölkə başçısı bildirib ki, bunun səbəbi Azərbaycan Xalq Cümhuriyyəti 1920-ci ildə süqut etdikdən beş ay sonra Sovet hakimiyyətinin Qərbi Zəngəzuru ölkəmizdən ayırıb Ermənistana birləşdirməsidir.

Sitat: “Bir əsrdən çox davam edən bu ədalətsizlik Naxçıvanda yaşayan soydaşlarımızın həyatına çox mənfi təsir göstərmişdir. Xüsusilə Birinci Qarabağ savaşı başlayan kimi Ermənistan Qarabağı işğal etdi və eyni zamanda, Naxçıvanı blokadaya aldı. Onların planları Naxçıvanı da işğal etmək idi. Ancaq o zaman atam Heydər Əliyev Naxçıvanın rəhbəri kimi buna imkan vermədi və ərazini qorumaq üçün bütün naxçıvanlılar səfərbər oldular.

Naxçıvanın o zaman işğal altına düşməməsinin səbəblərindən biri də o idi ki, o zaman Naxçıvanı Türkiyə ilə birləşdirən “Ümid” körpüsü inşa edilmişdir və Türkiyədən gələn yardımlar Naxçıvanın qorunmasına çox önəmli töhfə vermişdir”.

Globalinfo.az-a danışan siyasi şərhçi Füzuli Qurbanov deyib ki, Azərbaycan Prezidenti çox dərin və uzaqgörən fikir irəli sürüb:

“Həqiqətən də, 100 il öncə Zəngəzurla bağlı situasiya fərqli idi. Ölkə başçısı bunu indi dilə gətirərək dünyaya mesaj verdi. Faktiki olaraq Zəngəzur Azərbaycandan qanunsuz şəkildə alınaraq Ermənistana birləşdirilib və beləliklə də regionun siyasi xəritəsini əsaslı şəkildə dəyişib. Bunu edən qüvvələr həm də paralelində azərbaycanlılara qarşı soyqırıma şərait yaratmış oldular.

Bu gün həmin imperialist qüvvələrin gözü önündə Zəngəzurla bağlı tarixi ədalət bərpa edilməlidir. Hazırda reallıqlar dəyişib. Söhbət həm regional, həm də geosiyasi reallıqlardan gedir. Bunun kökündə duran bir neçə məqam var. Azərbaycan artıq çox güclü ölkədir, həmçinin Türkiyə ilə müttəfiqdir. Ankara və Bakı hər sahədə ortaq hərəkət edir, çətinliklərə birgə sinə gərirlər. Növbəti mərhələdə Zəngəzur Türk dünyasının birləşdirilməsi üçün mühüm rol oynayacaq”.